Mirëmëngjesi për të gjithë!
Ora në Kiev shënon 08:00.
Delegacionet e Ukrainës dhe Rusisë pritet të takohen sot për një rund të ri bisedimesh, me synim ndaljen e armiqësive në Ukrainë.
Palët janë takuar edhe dy herë të tjera, qëkur Rusia ka nisur pushtimin e Ukrainës më 24 shkurt, por pa ndonjë rezultat konkret.
“Rundi i tretë i bisedimeve do të zhvillohet të hënën”, ka thënë dy ditë më parë negociatori ukrainas, David Arakhamia.
Negociatori rus, Leonid Slutsky, ka thënë se “rundi i tretë mund të zhvillohet në ditët në vijim” dhe se “ka gjasa të zhvillohet të hënën”.
Dy rundet e para të bisedimeve janë mbajtur në Bjellorusi. Më shumë detaje për rundin e sotëm nuk ka ende.
Përcilleni blogun e Radios Evropa e Lirë për lajme në kohë reale.
Rusia thotë se do të bëjë armëpushim për evakuimin e civilëve
Rusia do të hapë korridore të reja humanitare nëpër disa qytete të Ukrainës, për të lejuar evakuimin e civilëve, raportojnë mediat shtetërore.
Sipas Ministrisë ruse të Mbrojtjes, armëpushimi do të bëhet nga ora 10:00 - sipas kohës lokale - në kryeqytetin Kiev, si dhe në qytetet Harkiv, Mariupol dhe Sumi.
Të gjitha këto qytete janë duke u sulmuar nga forcat ruse.
Pala ukrainase nuk e ka konfirmuar ende armëpushimin.
Gjatë fundjavës, dy përpjekje për të hapur korridore evakuimi për civilët nga Mariupoli, dështuan.
Zyrtarët ukrainas fajësuan Rusinë, duke thënë se edhe gjatë orëve të dakorduara për armëpushim, ajo vazhdoi bombardimet.
Rusia po përgatitet për "sulm të gjithanshëm" në Kiev
Zyrtarët e mbrojtjes në Ukrainë paralajmëruan se Rusia po përgatit forcat e saj për të nisur një sulm të gjithanshëm në kryeqytetin Kiev.
Shtabi i përgjithshëm i ushtrisë ukrainase tha se ushtria ruse ka grumbulluar tanke dhe njësi të motorizuara të këmbësorisë, që aktualisht janë në rrugë drejt qytetit të afërt, Irpin.
Në njoftim thuhet se komandantët rusë kanë furnizuar forcat e tyre me karburante të dërguara nga Bjellorusia.
Zyrtarët po ashtu thanë se ushtria ruse po i përqendron përpjekjet e saj edhe në rrethimin e qyteteve lindore, Harkiv dhe Çernihiv, dhe të qytetit jugor, Mikollajiv.
Mbretëria e Bashkuar ndan edhe 100 milionë dollarë për Ukrainën
Qeveria britanike planifikon t’i japë rreth 100 milionë dollarë Ukrainës, për ta ndihmuar funksionimin e Qeverisë atje, njoftoi Zyra e kryeministrit Boris Johnson.
Sipas njoftimit, financat do të ndihmojnë për pagimin e pensioneve dhe të rrogave të sektorit publik.
Shuma e re vjen jashtë 290 milionë dollarëve që Qeveria britanike i ka ndarë tashmë për Ukrainën.
Paratë do të dorëzohen përmes një fondi të mirëbesimit të Bankës Botërore.