Zelensky, trupave ruse: S’do ketë vend të qetë për ju, përveç varrit
Presidenti i Ukrainës, Volodymyr Zelensky, paralajmëroi ushtrinë ruse se forcat e tij “do të ndjekin deri në varr çdo ushtar që kryen krime lufte” në Ukrainë.
Ushtarët rusë “do të përballen me ditën e gjykimit” për “vrasje të qëllimshme”, tha ai në një adresim nga Kievi.
“Ne nuk do të falim. Nuk do të harrojmë. Do t’i ndëshkojmë të gjithë ata që kryejnë mizori në këtë luftë. Në tokën tonë”, tha Zelensky.
“Nuk do të ketë vend të qetë në këtë tokë për ju, përveç varrit”, shtoi ai.
Zelensky u kërkoi udhëheqësve perëndimorë që të ndërmarrin veprime më të fuqishme kundër Moskës, duke thënë se “guximi i agresorit është një sinjal i qartë për Perëndimin, se sanksionet kundër Rusisë nuk janë të mjaftueshme”.
Perëndimi është duke bërë përpjekje ta izolojë Rusinë, si në aspektin ekonomik, ashtu edhe atë diplomatik, për shkak të pushtimit të Ukrainës.
Presidenti rus, Vladimir Putin, ka dhënë urdhrin për pushtim më 24 shkurt, pasi nuk ka marrë garanci nga NATO-ja se nuk do të zgjerohet drejt lindjes.
Raportohet se forcat ruse janë duke avancuar drejt kryeqytetit Kiev.
Çmimi i naftës rritet në nivelin më të lartë që nga viti 2008
Çmimet e naftës u rritën në nivelin më të lartë që nga viti 2008, pasi SHBA-ja tha se po diskuton me aleatët për embargo të mundshme mbi furnizimet ruse.
Nafta e papërpunuar Brent, e cila përdoret si standard ndërkombëtar, shkoi në mbi 139 dollarë për fuçi, përpara se të binte sërish nën 130 dollarë.
Tregjet e energjisë janë tronditur ditëve të fundit, për shkak të frikës për furnizime, të shkaktuar nga pushtimi rus i Ukrainës.
Sekretari amerikan i Shtetit, Antony Blinken, tha të dielën se administrata amerikane po shqyrton embargon mbi furnizimet ruse me naftë.
Pas tij, kryetarja e Dhomës së Përfaqësuesve të SHBA-së, Nancy Pelosi, tha se Dhoma po “eksploron” legjislacionin për ndalimin e importit të naftës ruse, që, sipas saj, do ta izolonte edhe më shumë Rusinë nga ekonomia globale.
Perëndimi ka ndërmarrë një varg sanksionesh të rënda kundër Rusisë, qëkur ka nisur pushtimin e plotë të Ukrainës, më 24 shkurt.
Presidenti rus, Vladimir Putin, ka dhënë urdhrin për pushtim pasi nuk ka marrë garanci nga NATO-ja se nuk do të zgjerohet drejt lindjes.
Situata ka lëkundur menjëherë tregjet e energjisë.
Çmimi i naftës së papërpunuar Brent është rritur për më shumë se 20% javën e kaluar.
Të hënën, tregjet e aksioneve në Azi u hapën më poshtë: Nikkei i Japonisë dhe Hang Seng i Hong Kongut ranë për më shumë se 3%.
Perëndimi kërkon pezullimin e Rusisë nga Interpol-i
Disa vende perëndimore, përfshirë Britaninë e Madhe dhe Shtetet e Bashkuara, i bënë thirrje Interpol-it që ta pezullojë Rusinë nga organizata ndërkombëtare e zbatimit të ligjit.
Sipas sekretares së Brendshme britanike, Priti Patel, Mbretëria e Bashkuar, Shtetet e Bashkuara, Kanadaja, Australia dhe Zelanda e Re kërkuan “pezullimin e menjëhershëm të qasjes së Rusisë” në sistemet e Interpol-it.
“Veprimet e Rusisë paraqesin kërcënim të drejtpërdrejtë për sigurinë e individëve dhe për bashkëpunimin ndërkombëtar në zbatimin e ligjit”, tha Patel.
Grupi i kërkoi komitetit ekzekutiv të Interpol-it që të marrë një vendim këtë javë.
Patel nuk e specifikoi arsyen e kërkesës, por aleatët perëndimorë janë duke izoluar Rusinë, në aspektin diplomatik dhe ekonomik, qëkur shteti rus ka nisur pushtimin e Ukrainës, më 24 shkurt.
Të dielën, sekretari amerikan i Shtetit, Antony Blinken, tha se Uashingtoni ka parë “raporte shumë të besueshme” se Rusia ka kryer krime lufte gjatë inkursionit, veçanërisht në trajtimin e civilëve.
Javën e kaluar, anëtarët e Këshillit të OKB-së për të Drejtat e Njeriut kanë votuar me shumicë dërrmuese për të nisur hetimin e akuzave për abuzime, të kryera nga forcat ruse në Ukrainë.
Interpol-i, një rrjet prej 194 vendeve anëtare, synon të mbajë nën kontroll krimet ndërkombëtare.
Më shumë se 1.5 milion njerëz janë larguar nga lufta në Ukrainë.
Sipas Fondacionit për Fëmijë të OKB-së, më shumë se gjysmë milioni janë fëmijë.
