Granatimet shkatërrojnë shkollat në Ukrainë
Një nxënëse e plagosur ka publikuar një video në Instagram, ku ka thënë: “Shpresoj që gjërat janë më mirë në vendin ku jetoni... Dërgojuani këtë video të gjithë miqve tuaj rusë”.
Presidenti i Lituanisë: Putin nuk do të ndalet në Ukrainë
Presidenti i Lituanisë, Gitanas Nauseda, paralajmëroi të hënën kryediplomatin amerikan, Antony Blinken, se dështimi për të ndaluar agresionin rus në Ukrainë, do të çojë në një konflikt global.
Sekretari amerikan i Shtetit po qëndron për vizitë në Vilnius.
Duke iu drejtuar atij, Nauseda tha se udhëheqësi rus, Vladimir Putin, “nuk do të ndalet në Ukrainë” dhe se bota e ka detyrim t’i ndihmojë ukrainasit “me të gjitha mjetet në dispozicion”.
“Vërtet mendoj në të gjitha mjetet, nëse duam të shmangim Luftën e Tretë Botërore. Zgjedhja është në duart tona”, tha ai.
Lituania, vend anëtar i NATO-s, ka dërguar ndihmë ushtarake në Ukrainë dhe ka mirëpritur disa refugjatë ukrainas qëkur ka filluar pushtimi i saj nga Rusia, më 24 shkurt.
Blinken u takua me Nausedan përpara bisedimeve me ministrin e Jashtëm dhe kryeministrin e Lituanisë.
Ai i tha më herët stafit të Ambasadës amerikane në Vilnius, se pushtimi rus i Ukrainës ka sfiduar parimet bazë, të krijuara për ruajtjen e paqes midis vendeve.
Borrell: Pesë milionë njerëz mund të ikin nga Ukraina
Rreth pesë milionë ukrainas pritet të ikin nga vendi i tyre, nëse bombardimet e ushtrisë ruse vazhdojnë, tha të hënën shefi i politikës së jashtme të Bashkimit Evropian, Josep Borrell.
"Ne duhet të përgatitemi për të pritur rreth pesë milionë njerëz... Ne duhet t’i mobilizojmë të gjitha burimet e BE-së për t’i ndihmuar ato vende që marrin refugjatë", u tha Borrell gazetarëve në Bruksel.
"Ne do të kemi nevojë për më shumë shkolla, më shumë qendra pritjeje, gjithçka...", shtoi ai.
Kombet e Bashkuara kanë thënë se mbi 1.5 milion ukrainas janë larguar nga shtëpitë e tyre qëkur Rusia ka nisur pushtimin e Ukrainës, më 24 shkurt.
Numri më i madh i tyre, gati një milion, është vendosur në Poloni.
Kina do t’i ofrojë ndihmë humanitare Ukrainës
Kryqi i Kuq i Kinës do të ofrojë ndihmë humanitare për Ukrainën, tha ministri i Jashtëm kinez, Wang Yi.
Ai përsëriti thirrjen për vazhdimin e bisedimeve diplomatike midis Rusisë dhe Ukrainës, me qëllim ndaljen e luftës.
Wang theksoi se miqësia e Kinës me Rusinë është “e fortë” dhe se perspektivat për bashkëpunim janë shumë të gjera.
Deklarata e tij vjen pak orë pasi kryeministri i Australisë, Scott Morrison, i kërkoi Kinës të denoncojë Rusinë dhe të marrë anën e Ukrainës.
Për më shumë, lexoni këtu.