Ukraina në fundjavën që shkoi:
Vdekjet e civilëve shtohen teksa Rusia vazhdon bombardimet në Ukrainë
Rusia e Ukraina takohen në orët e pasdites
Rundi i tretë i bisedimeve midis Ukrainës dhe Rusisë do të nisë sot në orën 16:00 me kohën e Kievit.
Lajmin e konfirmoi në Twitter Mihailo Podolyak, këshilltar i presidentit të Ukrainës, Volodymyr Zelensky, njëherësh pjesëmarrës në delegacionin negociues.
Bisedimet synojnë t'i japin fund luftës që ka nisur me pushtimin e paprovokuar të Ukrainës nga Rusia, më 24 shkurt.
Dy vendet kanë mbajtur tashmë në Bjellorusi edhe dy runde bisedimesh, por pa ndonjë rezultat konkret.
Kosova në solidaritet me Ukrainën
“Qëndrojmë me Ukrainën”, “Paqe për Ukrainën” dhe “Bota ka parë mjaftueshëm luftëra” ishin disa prej sloganeve të protestës solidarizuese me popullin ukrainas, që u mbajt të hënën në Prishtinë.
Ukraina është nën pushtimin e Rusisë qysh më 24 shkurt.
Sipas Kombeve të Bashkuara, qindra njerëz janë vrarë dhe mbi 1.5 milion janë zhvendosur.
Në protestën në Prishtinë, që u organizua nga disa organizata joqeveritare, morën pjesë qytetarë, por edhe përfaqësues të institucioneve të Kosovës dhe diplomatë të akredituar në Prishtinë.
Dajana Berisha, drejtoreshë e Forumit për Iniciativa Qytetare, tha se populli i Kosovës i di vështirësitë që po i kalon populli ukrainas.
Ajo tha se kjo protestë është për të treguar rreshtimin e Kosovës karshi vlerave perëndimore dhe demokratike.
“Ne jemi sot këtu - përmes një gjesti simbolik - për të shprehur solidaritetin e Kosovës në rrafshin njerëzor, institucional, të OJQ-ve, ndaj popullit të Ukrainës”, tha Berisha.
E pranishme në protestë ishte edhe presidentja e Kosovës, Vjosa Osmani. Ajo tha se ngjarjet në Ukrainë rikthejnë kujtimet e luftës në Kosovë, në fund të viteve ’90.
Osmani tha se Kosova ka shprehur gatishmërinë që të strehojë gazetarë dhe shtetas ukrainas, brenda kapaciteteve të saj.
“Kosova ka treguar gatishmëri që të japë mbështetje, por edhe mikpritje për gazetarët në Kosovë. Gjithçka që është në dorën tonë, e kemi bërë dhe do të vazhdojmë ta bëjmë, brenda kapaciteteve tona”, tha Osmani.
Për më shumë, lexoni këtu.