Pentagoni: Nuk ka përparim të madh të Rusisë në veri dhe verilindje të Ukrainës
Shtetet e Bashkuara kanë thënë se nuk besojnë që forcat ruse kanë bërë përparim të madh në veri dhe verilindje të Ukrainës në ditët e fundit, ka thënë Pentagoni të hënën.
Zëdhënësi i Petagonit, John Kirby, ka thënë se trupat ruse kanë marrë kontrollin e qytetit Herson dhe po tentojnë të rrethojnë Mariupolin, mirëpo nuk e kanë nën kontroll.
OBSH: Të paktën 16 sulme në objekte për kujdes shëndetësor
Organizata Botërore e Shëndetësisë (OBSH) ka thënë se ka verifikuar të paktën 16 sulme ndaj objekteve për kujdes shëndetësor, prej shpërthimit të luftës në Ukrainë.
Sulmet kanë çuar në të paktën nëntë vdekje dhe 16 plagosje, duke përfshirë shtatë punëtorë për kujdes shëndetësor.
Raportimet tjera për incidente janë duke u verifikuar.
Në një deklaratë të publikuar në Twitter, Organizata ka dënuar ashpër këto sulme.
“Sulmet ndaj kujdesit shëndetësor shkelin ligjin ndërkombëtar dhe rrezikojnë jetët”, ka thënë OBSH.
Raportohet se Rusia ka prezantuar korridoret humanitare
Rusia ka thënë të hënën se do të hapë korridoret humanitare të martën për t’ua mundësuar civilëve evakuimin nga disa qytete ukrainase, përfshirë kryeqytetin Kiev dhe qytetin Mariupol, ka raportuar agjencia e lajmeve AFP duke cituar agjencitë ruse të lajmeve.
“Nga 10:00 me orën lokale, më 8 mars, Federata Ruse është duke shpallur ‘regjim të heshtjes’ dhe është e gatshme të ofrojë korridore humanitare”, ka thënë një degë e Ministrisë ruse të Mbrojtjes, e angazhuar me operacionet humanitare në Ukrainë.
Aty janë renditur disa rrugë të evakuimit nga Kiev, Mariupol, Harkiv dhe Sumoj – qytete të cilat janë përballur me sulme të ashpra nga forcat ruse në ditët e fundit.
“Më shumë se 742,000 njerëz pa rrymë në Ukrainë”
Ministria e Energjisë në Ukrainë ka thënë që më shumë se 742,000 njerëz nuk kanë qasje në energji elektrike në këtë shtet.
Ajo ka thënë se situata më e rëndë është në rajonin Donjeck, ku mbi 233,000 njerëz janë “krejtësisht të shkyçur”.
Ministria ka shtuar që më shumë se 238,000 ukrainas janë edhe pa gaz.
Dhjetëra konsumatorëve u është rikthyer qasja në rrymë dhe gaz në 24 orët e fundit, ka thënë Ministria, por “armiqësitë aktive kanë shkaktuar ndërprerje të reja”.