Banka Botërore ndan mbi 720 milionë dollarë për Ukrainën
Banka Botërore miratoi një financim emergjent prej 723 milionë dollarësh, për të ndihmuar Qeverinë e Ukrainës që të paguajë pagat dhe pensionet e sektorit publik.
Banka tha se paketa përfshin financime nga Mbretëria e Bashkuar, Holanda, Suedia, Japonia, Danimarka, Letonia, Lituania dhe Islanda.
Banka Botërore po ashtu tha se po punon për të lëshuar 3 miliardë dollarë të tjerë për Ukrainën dhe vendet e saj fqinje, në muajt e ardhshëm.
Ukraina: Përparimi i ushtrisë ruse është ngadalësuar
Ushtria e Ukrainës doli me informacionet e fundit mbi pushtimin rus, duke thënë se “armiku po vazhdon operacionin sulmues, por ritmi i përparimit të trupave të tij është ngadalësuar ndjeshëm”.
Në ditën e 13-të të sulmit rus, Shtabi i Përgjithshëm i Forcave të Armatosura të Ukrainës tha se trupat ukrainase po vazhdojnë të mbrohen në sektorët jugorë, lindorë dhe veriorë dhe se kryeqyteti Kiev dhe qyteti verior i Çernihivit janë ende në duart e Ukrainës.
Ai shtoi se mbrojtja ajrore e Ukrainës po i zmbraps me sukses sulmet raketore dhe ajrore.
“Pushtuesit janë të demoralizuar dhe shkelin gjithnjë e më shumë rregullat e së drejtës ndërkombëtare humanitare për konfliktin ushtarak”, tha ushtria e Ukrainës.
REL nuk ka mundur t’i verifikojë në mënyrë të pavarur këto pretendime.
Përshëndetje për të gjithë dhe faleminderit që ndiqni blogun e Radios Evropa e Lirë!
Pushtimi i Ukrainës nga Rusia ka hyrë sot në ditën e 13-të.
Disa nga lajmet e fundit janë:
- Shefi për çështje humanitare i Kombeve të Bashkuara, Martin Griffiths, i bëri thirrje Ukrainës dhe Rusisë që të sigurojnë korridore të sigurta për civilët që ikin nga luftimet dhe për dërgimin e ndihmave humanitare në zonat e armiqësive aktive.
- Granatimet e ushtrisë ruse vazhdojnë të pengojnë evakuimin e civilëve nga qytetet e rrethuara: Kiev, Mariupol, Sumi dhe Harkiv, thotë Ukraina.
- Mediat shtetërore ruse thonë se ushtria ruse është e gatshme t’i rihapë korridoret humanitare.
- Ukraina ka refuzuar të hënën propozimin rus për largimin e civilëve, pasi shumë nga rrugët e evakuimit çonin vetëm në Rusi ose në aleatin e saj - Bjellorusi.
- Rundi i tretë i bisedimeve për paqe midis Rusisë dhe Ukrainës përfundoi të hënën me pak marrëveshje. Rundi i katërt pritet të zhvillohet sot.
- Ministrat e Jashtëm të Ukrainës dhe Rusisë do të takohen këtë të enjte në Turqi.
Polonia me rreth 1.2 milion të ardhur nga Ukraina
Rreth 1.2 milion ukrainas kanë hyrë në Poloni qëkur Rusia ka nisur pushtimin e Ukrainës, më 24 shkurt, tha të martën Roja Kufitare Polake.
Sipas saj, mbi 141,500 të zhvendosur kanë hyrë vetëm të hënën.
Kombet e Bashkuara thanë se numri i përgjithshëm i të zhvendosurve ukrainas ka kaluar 1.7 milion.
Disa prej tyre janë vendosur edhe në Moldavi, Sllovaki, Hungari dhe Çeki.
Shefi i politikës së jashtme të BE-së, Josep Borrell, tha se Evropa duhet të përgatitet për miliona të zhvendosur nga Ukraina.
