Zelensky në ballinën e revistës New Yorker
Presidenti i Ukrainës, Volodymyr Zelensky, është zgjedhur për ballinën e numrit të fundit të revistës amerikane, New Yorker.
Ilustrimi e paraqet Zelenskyn duke qëndruar i vetëm para një sfondi shpërthimesh.
Ai është i veshur me rroba ushtarake dhe mban flamurin e Ukrainës lart, ndërsa është i kthyer nga perëndimi.
Revista tha se ilustrimi i ballinës quhet “Qëndrueshmëri”.
Numri i refugjatëve ukrainas do të kalojë 2 milionë “sot” ose “nesër”
Kreu i agjencisë së OKB-së për refugjatët tha se pret që numri i njerëzve që ikin nga lufta në Ukrainë, të arrijë shpejt në dy milionë.
“Unë mendoj se do ta kalojmë shifrën prej 2 milionësh sot, ose ndoshta më së voni nesër”, tha Komisionari i Lartë i Kombeve të Bashkuara për Refugjatët, Filippo Grandi.
Kombet e Bashkuara kanë konfirmuar të hënën se numri i të zhvendosurve ukrainas ka kaluar 1.7 milion.
Roja Kufitare Polake tha sot se rreth 1.2 milion prej tyre kanë hyrë në Poloni.
Shefi i politikës së jashtme të BE-së, Josep Borrell, ka paralajmëruar se Evropa duhet të përgatitet për miliona të zhvendosur nga Ukraina.
Rusia kërcënon me ndalimin e gazit të saj në Evropë
Rusia tha se mund të mbyllë tubacionin e saj kryesor të gazit në Gjermani, nëse Perëndimi ndalon naftën ruse.
Zëvendëskryeministri Alexander Novak tha se “refuzimi i naftës ruse do të çonte në pasoja katastrofike për tregun global”, duke bërë që çmimet të dyfishohen në 300 dollarë për fuçi.
Shtetet e Bashkuara dhe aleatët e tyre janë duke shqyrtuar ndalimin e mundshëm të naftës ruse, si masë ndëshkuese për Rusinë, për shkak të pushtimit të Ukrainës.
Por, Gjermania dhe Holanda e hodhën poshtë planin të hënën.
Bashkimi Evropian merr rreth 40% të gazit dhe 30% të naftës nga Rusia dhe nuk ka zëvendësues të lehtë nëse furnizimet ndërpriten.
Në një fjalim në televizionin shtetëror rus, Novak tha se “do të jetë e pamundur të gjendet shpejt një zëvendësues për naftën ruse në tregun evropian”.
“Do të duhen vite dhe do të jetë akoma shumë më e shtrenjtë për konsumatorët evropianë. Ata do të dëmtohen më së keqi nga ky skenar”, tha ai.
Për më shumë, lexoni këtu.
Pamje nga qyteti Lviv i Ukrainës, më 8 mars, 2022
Refugjatët që ikin nga lufta në Ukrainë presin me orë të tëra për të marrë trenin drejt Polonisë, raportojnë korrespondentët në terren.
