Së paku 21 civilë të vrarë në Sumi
Së paku 21 civilë, përfshirë dy fëmijë, u vranë nga një sulm ajror i ushtrisë ruse në qytetin verilindor të Ukrainës, Sumi, tha sot Zyra e prokurorit rajonal.
Sulmi ndodhi të hënën vonë në një lagje të banuar.
Trupat e viktimave u gjetën nga shërbimet e urgjencës herët të martën, tha Zyra e prokurorit.
Autoritetet ruse dhe ukrainase u pajtuan sot për hapjen e disa korridoreve humanitare, që do të mundësojnë evakuimin e civilëve.
Një korridor i tillë u hap edhe në qytetin Sumi, i cili ndodhet rreth 350 kilometra në lindje të kryeqytetit të Ukrainës, Kiev.
HRW: Rusia mund të ketë thyer ligjet e luftës në Irpin
Organizata ndërkombëtare e të drejtave të njeriut, Human Rights Watch, tha se ushtria ruse mund të ketë shkelur ligjet e luftës me sulmin e kryer në qytetin Irpin të Ukrainës.
Për disa orë më 6 mars, forcat ruse kanë bombarduar një kryqëzim rrugësh në qytet, të cilin civilët e kanë përdorur për të ikur nga bombardimet, tha Human Rights Watch.
“Natyra e përsëritur e sulmeve, të cilat sipas Qeverisë [së Ukrainës] kanë vrarë së paku tetë civilë, sugjeron se forcat ruse kanë shkelur detyrimet e tyre me ligjin ndërkombëtar humanitar, për të mos kryer sulme joproporcionale që dëmtojnë civilët”, tha organizata.
Irpini është një qytet i vogël që ndodhet në perëndim të Kievit.
Të martën, autoritetet ruse dhe ukrainase u pajtuan për hapjen e disa korridoreve humanitare për evakuimin e civilëve.
Një korridor i tillë u hap edhe në Irpin dhe guvernatori i rajonit të Kievit, Oleksiy Kuleba, konfirmoi evakuimin e qindra civilëve nga qyteti.
Pse Ukrainës i duhen avionët e huaj?
SHBA-ja po shqyrton propozimin, sipas të cilit, shteti fqinj i Ukrainës, Polonia, ta furnizojë Kievin me avionë luftarakë të kohës sovjetike dhe në këmbim të marrë avionë amerikanë.
Për më shumë, lexoni këtu.
Ministri britanik: Pushtimi i Ukrainës do të shënojë rënien e Putinit
Sekretari britanik i Mbrojtjes, Ben Wallace, tha se pushtimi i Ukrainës do të shënojë rënien e presidentit rus, Vladimir Putin.
Wallace tha se forcat ruse, që janë angazhuar në pushtimin e Ukrainës, janë “rraskapitur” tashmë nga rezistenca e forcave lokale.
Ai tha se ushtria ruse po përballet me probleme logjistike dhe ka pësuar mijëra humbje në 13 ditët e para të pushtimit.
Wallace shtoi se është “detyrë e pamundur” të pushtosh një vend me 44 milionë banorë.
“Ky do të jetë fundi i Putinit dhe kështu duhet të jetë”, tha Wallace për BBC-në.
Sipas tij, Putin është tashmë “një forcë e shpenzuar” në botën e gjerë, sepse komuniteti ndërkombëtar ka konstatuar se pushtimi i Ukrainës dhe katastrofa humanitare që ai ka shkaktuar, “janë të papranueshme”.
Sanksionet ndërkombëtare, të vendosura ndaj Rusisë, “po e zvogëlojnë ekonominë e tij në zero” dhe Putin “është përgjegjës për këtë”, tha Wallace.
