McDonald's mbyll të gjitha restorantet në Rusi
Kompania amerikane, McDonald’s, ka njoftuar se do të mbyllë përkohësisht të gjitha restorantet dhe do të ndalë të gjitha operacionet në Rusi.
Zinxhiri i ushqimit të shpejtë, është shumë i famshëm në Rusi me gati 850 dyqane dhe 62,000 punëtorë.
Kjo kompani është përballur me kritika pse nuk ka ndjekur shembullin e disa zinxhirëve që ofrojnë shërbime të ngjashme, të cilët kanë mbyllur pikat e tyre, pas pushtimit rus në Ukrainë.
Shefi i McDonald’s, Chris Kempczinski, ka thënë përmes një deklarate se konflikti “ka shkaktuar dhimbje të papërshkrueshme për njerëzit e pafajshëm” dhe “ne do t’i bashkohemi botës për të dënuar agresionin dhe dhunën, duke u lutur për paqe”.
Çfarë nënkupton ndalesa e SHBA-së në naftën ruse?
Teksa Rusia intensifikon luftën e saj në Ukrainë - duke vrarë civilë dhe duke nxitur krizë të madhe të refugjatëve - presidenti amerikan, Joe Biden ka bërë të ditur të martën, 8 mars, një ndalesë në importet e naftës ruse.
Kritikët e Rusisë kanë thënë se sanksionimi i eksporteve të energjisë do të mund të jetë mënyra më e mirë – ose e vetme – që Moska të tërheqë trupat.
Një embargo e plotë do të ishte më efektive nëse do të përfshinte edhe aleatët evropianë, të cilët po ashtu dëshirojnë që të ndalet dhuna në Ukrainë dhe janë të shqetësuar për rrezikun që përbën Moska në kontinentin evropian.
Megjithatë, ende është e paqartë nëse Evropa do të marrë pjesë në embargo, ndonëse Britania e Madhe ka bërë të ditur të martën se do të heqë dorë gradualisht nga nafta ruse deri në fund të vitit 2022.
Për dallim nga Shtetet e Bashkuara, sektori i energjisë në Evropë është tejet i varur nga importet e Rusisë, e cila njihet si shteti i dytë më i madh në botë që eksporton naftë të papërpunuar, pas Arabisë Saudite.
Tekstin e plotë e gjeni këtu
OBSH: Pushtimi i Ukrainës, katastrofë e madhe humanitare
Hans Kluge, drejtor për Evropën në Organizatën Botërore të Shëndetësisë (OBSH), e ka përshkruar pushtimin rus në Ukrainë si “katastrofë të madhe humanitare”.
Ai ka thënë për transmetuesin britanik, BBC se OBSH ka aktualisht tri prioritete:
- Të dërgojë furnizime mjekësore në zonat më të prekura të Ukrainës – oksigjen dhe ilaçe tjera për trajtim të diabetit dhe sëmundjeve të zemrës
- Për të forcuar sistemet për kujdes shëndetësor në shtetet fqinje të Ukrainës, ku vazhdon të rritet numri i refugjatëve
- Për të hapur një qendër operacionale të OBSH-së në Ukrainë
Duke folur në një konferencë për media, ai ka thënë të martën se në 13 ditët e pushtimit “ne shohim një sistem shëndetësor nën presion të madh, dhe përtej kufijve të Ukrainës, rritjen më të shpejtë të krizës së refugjatëve në më shumë se 75 vjet”.
Ai ka thënë se 16 sulme janë konfirmuar në shërbimet për kujdes shëndetësor në Ukrainë, duke rezultuar me nëntë viktima dhe dëmtime të objekteve.
Paralajmërohet se Putin mund të përshkallëzojë sulmet ndaj Ukrainës
Drejtorja e Agjencisë Kombëtare të Inteligjencës në Shtetet e Bashkuara, Avril Haines, ka paralajmëruar se sanksionet dhe ndalesat në fushëbetejë, ka pak mundësi të ndalin presidentin rus, Vladimir Putin nga synimi i tij për pushtim të Ukrainës dhe madje mund të rrisin ofensivën e tij në këtë shtet.
Duke folur në një seancë të Kongresit amerikan për kërcënimet e sigurisë globale, Haines ka thënë më 8 mars se përshkallëzimi i kostove të luftës në Ukrainë, që deri tani mund të kenë shkuar në mijëra jetë të humbura të rusëve, mund të zemërojnë Putinin dhe t’ia ndryshojnë këndvështrimin për atë që mund të konsiderohet fitore.
“Analistët tanë vlerësojnë se Putin ka pak mundësi të ndalet nga pengesat në fushëbetejë. Në të kundërtën, ai mund të përshkallëzojë situatën”, ka thënë Haines.
Ajo ka thënë se Shtetet e Bashkuara besojnë që Moska ka nënvlerësuar aftësinë e Ukrainës për t’u përballur me sulmet dhe se mbetet e paqartë nëse Putin synon të kontrollojë gjithë Ukrainën.
Nëse kjo qëndron, atëherë, sipas SHBA-së, atij do t’i duhet të angazhojë forca shtesë, apo të koncentrohet në zona më të vogla.