Coca-Cola pezullon bizneset në Rusi
Kompania Coca-Cola ka thënë se do të pezullojë operacionet e saj në Rusi.
Kjo është ndër kompanitë e fundit të mirënjohura nga Perëndimi që ndal punën në këtë shtet – pas veprimeve të ngjashme të marra sot nga McDonald’s dhe Starbucks.
“Zemrat tona janë me njerëzit që janë duke u përballur me veprime të paarsyeshme nga këto ngjarje tragjike në Ukrainë”, ka thënë Coca-Cola përmes një deklarate.
Kjo kompani është përballur me presion të madh në rrjetet sociale për t’u larguar nga Rusia.
Rusia do të ndalojë eksportin e disa lëndëve të para
Presidenti rus, Vladimir Putin, ka nënshkruar të martën, 8 mars, një dekret që ndalon eksportin e disa lëndëve të para.
Në këtë dekret është thënë se qëllimi i vendimit është të “garantojë sigurinë e Federatës Ruse dhe funksionimin e pandërprerë të industrisë”.
Kabineti rus duhet të vendosë në 48 orët e ardhshme se cilat vende i prek kjo ndalesë.
Vendimi do të zbatohet deri në fund të vitit 2022.
Ai është bërë publik vetëm disa orë pasi Shtetet e Bashkuara kanë vënë ndalesë në importet e naftës dhe gazit rus, dhe pasi Mbretëria e Bashkuar ka thënë se do të shmangë gradualisht varësinë ndaj naftës ruse.
Masat e reja ka mundësi që të përkeqësojnë tregjet e mallrave.
Përveç eksporteve masive të naftës, Rusia është gjithashtu furnizuese globale e drithërave dhe metaleve.
Banka Qendrore e Rusisë kufizon tërheqjet e valutës së huaj në 10 mijë dollarë
Banka Qendrore e Rusisë ka njoftuar më 8 mars të gjithë qytetarët me llogari në valuta të huaja, se nuk do të mund të tërheqin më shumë se 10 mijë dollarë amerikanë deri më 9 shtator.
Kjo Bankë, e cila më herët gjatë ditës së martë ka bërë të ditura një seri masash për t’iu ndihmuar tregjeve të goditura nga sanksionet e huaja, ka thënë përmes një deklarate se pavarësisht se në çfarë valute të huaj kanë klientët paratë e tyre, tërheqjet do të kryhen në dollarë amerikanë.
Kompania PepsiCo ndalon shitjen e pijeve të saj në Rusi
PepsiCo është bërë gjiganti i fundit i ushqimit dhe pijeve që ka zvogëluar bizneset në Rusi.
Kompania ka thënë se do të pezullojë shitjet e pijeve të saj në këtë shtet sikurse Pepsi-Cola, 7up dhe Mirinda, mirëpo do të vazhdojë të shesë formulë të qumështit për foshnja.
Njoftimi i Pepsit ka ardhur disa minuta pasi kompania rivale, Coca-Cola, ka thënë se do të pezullojë të gjitha bizneset në Rusi.
