Të nderuar lexues, këtu po e përmbyllim raportimin e drejtpërdrejtë për ditën e 13-të të luftës në Ukrainë.
Rikthehemi sërish të mërkurën, 9 mars, nga ora 07:00.
Ndër zhvillimet kyçe të ditës së martë kanë qenë këto:
- Shtetet e Bashkuara kanë vënë ndalesë të plotë në importet e naftës dhe gazit rus
- Rusia më pas ka thënë se do të vendosë ndalesë në eksportin e disa lëndëve të para, ndonëse nuk dihet ende në çka dhe kush do të preket
- Disa kompani tjera të mëdha kanë thënë se do të pezullojnë punën e tyre në Rusi, përfshirë McDonald’s, Starbucks, Coca-Cola dhe PepsiCo
- Presidenti ukrainas, Volodymyr Zelensky, ka përsëritur thirrjet për zonë të ndalim-fluturimit mbi Ukrainë dhe i ka kërkuar Perëndimit më shumë sanksione ndaj Rusisë. Ai i ka bërë këto deklarata në një fjalim historik para Parlamentit britanik, përmes video-lidhjes
- Polonia ka thënë se është e gatshme të dorëzojë të gjithë aeroplanët ushtarakë MiG-29 në Gjermani dhe t’i vendosë në dispozicion të Qeverisë amerikane
- Më shumë se dy milionë refugjatë kanë ikur tashmë nga Ukraina, prej nisjes së luftës më 24 shkurt, kanë thënë Kombet e Bashkuara
Mirëmëngjesi të gjithëve!
Po e rikthejmë raportimin e drejtpërdrejtë për situatën në Ukrainë.
Të mërkurën, 9 mars, ky vend po përballet me ditën e 14-të të luftës.
Ndër zhvillimet kyçe të orëve të para të mëngjesit kanë qenë këto:
- Ka pasur raportime për sirena në disa qytete ukrainase, përfshirë kryeqytetin Kiev
- Evakuimet nga qyteti verilindor Sumi janë kryer me sukses. Guvernatori i qytetit ka thënë se 5,000 persona besohet se janë larguar nga ky qytet në dy fazat e evakuimit
- Sumi, qytet afër kufirit me Rusinë, është përballur me bombardime të ashpra në ditët e fundit. Vetëm të hënën, 22 persona kanë vdekur – përfshirë tre fëmijë – si pasojë e sulmeve ajrore ruse, kanë thënë zyrtarët lokalë
- Tentime të ngjashme kanë dështuar në Çernihiv, sepse Rusia ka vazhduar të bombardojë rrugët dalëse, ka pretenduar Ukraina.
- Rusia ka bërë të ditur për një tjetër armëpushim, kanë raportuar mediat ruse
- Sipas Moskës, korridoret do të jenë të hapura në Kiev, Çernihiv, Sumi, Harkiv dhe Mariupol nga ora 10:00 sipas kohës lokale. Ky është njoftimi i tretë për armëpushime – ndonëse shumica kanë dështuar.
Ministrat e Jashtëm të Rusisë dhe Ukrainës do të takohen në Turqi
Ministri i Jashtëm rus, Sergei Lavrov dhe homologu i tij ukrainas, Dmytro Kuleba, do të takohen në Turqi, ka konfirmuar Ministria e Jashtme e Rusisë.
Ky do të jetë takimi i parë mes tyre, prej kur Rusia ka nisur pushtimin e Ukrainës më 24 shkurt.
Lavrov do të marrë pjesë në një forum diplomatik ndërkombëtar në Antalia dhe “kontakti” i tij me Kuleban planifikohet të ndodhë atje, ka raportuar agjencia e lajmeve RIA Novosti, duke cituar zëdhënësen e Ministrisë së Jashtme ruse, Maria Zakharova.
Takimi ishte propozuar nga ministri i Jashtëm turk, Mevlut Cavusoglu, sipas të cilit takimi do të mbahej në format trelateral, me të, Kuleban dhe Lavrovin në një tavolinë.
Deri më tani është raportuar se takimi do të ndodhë më 10 mars, derisa forumi diplomatik do të nisë më 11 mars.
Bisedimet për paqe mes Rusisë dhe Ukrainës kanë qenë sfiduese deri më tani, pasi ende nuk është arritur ndonjë marrëveshje.
Delegacionet e të dyja palëve kanë zhvilluar tri runde të negociatave në Bjellorusi.
Shefi i CIA-s: Putini kishte planifikuar kontrollin e Kievit brenda dy ditësh
Presidenti rus, Vladimir Putin ka planifikuar marrjen e kontrollit të Kievit brenda dy ditësh, ka thënë shefi i Agjencisë Qendrore të Inteligjencës në Shtetet e Bashkuara, William Burns.
Duke folur në një seancë para Kongresit amerikan, Burns u ka thënë ligjvënësve se mendon që Putin është i zemëruar tani.
“Ai ka mundësi që të rrisë përpjekjet për të rrëzuar ushtrinë ukrainase, pavarësisht viktimave civile”.
Burns ka thënë se Putin e ka përfshirë veten në një kombinim shpërthyes të “ankesave dhe ambicieve për shumë vjet”.
