Civilët nisin të largohen nga Sumi me makina
Moska ka thënë se ka hapur korridoret humanitare më 9 mars, për të dytën ditë me radhë, në mënyrë që njerëzit të largohen nga Kievi dhe katër qytete tjera, teksa numri i refugjatëve që largohen nga Ukraina ka kaluar shifrën 2 milionë.
Civilët kanë nisur të largohen nga qyteti Sumi në makina private, pas hapjes së “korridorit humanitar”, ka thënë kryetari i këtij qyteti, Oleksandr Lysenko.
Ukrainasi që po iu ndihmon njerëzve të ikin nga lufta
Roman Kalgin la punën si zyrtar i teknologjisë informative, për të marrë njerëz nga turmat e ukrainasve të zhvendosur në stacionin e trenave në Lviv, dhe për t’i dërguar ata me furgonin e tij në kufirin me Poloninë. “Njerëzit vinë të thyer, në lot”, thotë ai. “Duhet t’i qetësosh ata dhe t’iu thuash se gjithçka do të jetë mirë”.
Ukraina: Gjashtë korridore humanitare për të evakuuar civilët
Ukraina do të tentojë të evakuojë civilët përmes gjashtë “korridoreve humanitare” të mërkurën, përfshirë Mariupolin e rrethuar nga forcat ruse, ka thënë zëvendëskryeministrja ukrainase, Iryna Vereshchuk.
Ajo ka thënë përmes një video-adresimi se forcat e armatosura ukrainase janë pajtuar për të ndalur luftimet për 12 orë, nga ora 09:00 deri më 21:00, dhe u ka bërë thirrje forcave ruse që të përmbushin zotimin e tyre për armëpushime lokale.
Ky lajm vjen pasi Ukraina ka arritur të kryejë me sukses evakuimet e para të martën.
Është vlerësuar se 5,000 persona kanë arritur që të largohen nga qyteti Sumi, i cili gjendet në kufi me Rusinë.
Autoritetet në Kiev kanë akuzuar më parë Moskën se është duke bombarduar korridoret humanitare, teksa njerëzit kanë tentuar të largohen nga Mariupoli.
Ende nuk dihet se ku çojnë gjashtë korridoret e propozuara humanitare.
Propozimet e kaluara për rrugë drejt Rusisë dhe Bjellorusisë janë refuzuar nga Qeveria ukrainase.
OKB: Tani është koha për të ofruar ndihmë në kufij
Sipas Kombeve të Bashkuara, më shumë se 2 milionë njerëz janë larguar nga Ukraina prej nisjes së sulmit rus më 24 shkurt.
Agjencia e OKB-së për Refugjatë, ka thënë se tani fokusi duhet të jetë në ofrimin e ndihmës për refugjatët në kufi, ka raportuar agjencia e lajmeve, Reuters.
Duke folur në një konferencë për media në Stokholm, Komisionari i Lartë i kësaj Agjencie, Filippo Grandi, ka thënë se “tani është koha që ketë përpjekje për ndihmë në kufi” sesa që vetëm të ketë diskutime sesi refugjatët të ndahen mes shteteve.
Ai ka theksuar se Moldavia, e cila nuk është anëtare e Bashkimit Evropian, por ndan kufi me Ukrainën, është veçanërisht e cenueshme për shkak të fluksit të refugjatëve.
Të shtunën, Ministria e Jashtme moldave ka thënë se shteti është afër “pikës së thyerjes”.