Ukraina kërkon Gjykatë Speciale për hetimin e krimeve ruse
Prokurorja e përgjithshme ukrainase, Iryna Venediktova, bëri thirrje për një "model të ri" të përpjekjeve për hetimin e krimeve të dyshuara të luftës në Ukrainë, duke thënë se duhet të krijohet një Gjykatë Speciale për krizën e "paprecedent".
Ajo tha se 39 vende i janë bashkuar ankesës së Ukrainës në Gjykatën Ndërkombëtare të Drejtësisë (ICJ) kundër Rusisë.
Sulmi i Rusisë ndaj një termocentrali bërthamor, dyshimet për përdorim të bombave thërrmuese dhe të ashtuquajturave 'bomba vakum' në zona të dendura me banorë, si dhe shënjestrimi i spitaleve, shkollave dhe zonave civile janë përshkruar gjithashtu si krime lufte.
Fillojnë bisedimet në mes të Ukrainës dhe Rusisë në Turqi
Ministri i Punëve të Jashtme i Rusisë, Sergei Lavrov, është takuar me homologun e tij ukrainas, Dmytro Kuleba, në Turqi, të enjten.
“Takimi ka filluar”, u ka thënë gazetarëve, zëdhënësja e Ministrisë së Jashtme ruse, Maria Zakharova.
Takimi është ndërmjetësuar nga ministri i Jashtëm i Turqisë, Mevlut Cavusoglu.
Pamjet nga takimi, të publikuara nga Zakharova, kanë shfaqur delegacionet përballë njëri-tjetrit në tryezën e bisedimeve.
Konfirmohen tre të vdekur nga sulmi rus mbi spitalin e Mariupolit
Tre persona kanë vdekur pasi u plagosën në një sulm rus me bombë në një maternitet në Ukrainë, thanë të enjten zyrtarët e qytetit të Mariupolit.
“Që nga sot, ne e dimë se pas bombardimit terrorist nga avionët rusë në spitalin e fëmijëve në Mariupol ka 17 viktima – fëmijë, gra, mjekë – dhe tre vdiqën, mes tyre një fëmijë, një vajzë”, thanë zyrtarët.
Ministri britanik thotë se Rusia po kryen krime lufte
Ministri i Forcave të Armatosura të Mbretërisë së Bashkuar, James Heappey, e ka quajtur krim lufte bombardimin e një materniteti dhe një reparti fëmijësh në Mariupol, në juglindje të Ukrainës.
Duke folur për BBC-në, Heappey tha se pavarësisht nëse ishte një sulm i shënjestruar apo jo, të dyja, sipas tij, përbëjnë një krim lufte.
Ai shtoi se është përgjegjësi e bashkësisë ndërkombëtare “të sigurohet që provat të mblidhen, të regjistrohen, në mënyrë që kur të vijë koha dhe ju premtoj se do të vijë koha, të ketë një mundësi për t'i ndjekur penalisht këta njerëz në Gjykatën Penale Ndërkombëtare.
