Gazi rus me rrjedhje stabile në tubacionet kryesore për në Evropë
Rusia po vazhdon të dërgojë gaz në Gjermani përmes “Rjedhës Veriore 1” dhe në Poloni dhe në Sllovaki përmes Ukrainës në nivele përgjithësisht të pandryshuara.
Kështu treguan të dhënat e operatorit të tubacionit të premten në mëngjes.
Rrjedha e gazit drejt perëndimit rifilloi më 25 shkurt, fillimisht me ndërprerje dhe më pas me rrjedhje stabile që nga mbrëmja e 8 marsit.
Putin: Vullnetarët të mirëseardhur për të ndihmuar në luftën me Ukrainën
Presidenti rus Vladimir Putin tha të premten se do të lejonte vullnetarët të luftonin kundër forcave ukrainase dhe miratoi dorëzimin e sistemeve të raketave perëndimore të kapura, te luftëtarët e mbështetur nga Rusia.
Ministri rus i Mbrojtjes, Sergei Shoigu propozoi dorëzimin e sistemeve antitank të prodhimit amerikan si Javelin dhe Stinger për luftëtarët nga rajonet Luhansk dhe Donjeck.
Putin, duke folur në një takim të këshillit rus të sigurisë, tha se ai e mbështet një ide të tillë.
Ai tha gjithashtu se ata që duan të dalin vullnetarë për të luftuar me forcat e mbështetura nga Rusia duhet të lejohen.
Shoigu tha se kishte 16,000 vullnetarë në Lindjen e Mesme që ishin gati të vinin për të luftuar me forcat e mbështetura nga Rusia.
Autoritetet ukrainase: Forcat ruse goditën spitalin psikiatrik në Ukrainë
Forcat ruse goditën një spital psikiatrik pranë qytetit lindor të Ukrainës, Izyum, të premten, thanë autoritetet rajonale.
Oleh Synegubov, guvernatori i rajonit të Harkivit, tha se 330 njerëz ishin në spital dhe se 73 ishin evakuuar.
Numri i viktimave ende nuk është përcaktuar, tha ai, duke e përshkruar atë si një "sulm brutal ndaj civilëve".
OKB: Më shumë se 2.5 milionë njerëz janë larguar nga Ukraina
Agjencia e Kombeve të Bashkuara e migracionit, tha të premten, më 11 mars se më shumë se 2.5 milionë njerëz janë larguar nga Ukraina deri më tani.
Shifrat e fundit tregojnë 200,000 refugjatë shtesë që nga raporti i fundit deri më 10 mars.
Në anën tjetër, , Zyra e OKB-së për Koordinimin e Çështjeve Humanitare tha të premten se të paktën 1.85 milionë njerëz u zhvendosën brenda Ukrainës.