Konvoji me ndihma dhe për evakuimin e civilëve, "rrugës për në Mariupol"
Konvojet me ndihmë humanitare dhe autobusët për evakuimin e civilëve janë nisur gjatë së shtunës drejt disa qyteteve ukrainase.
Zyrtarët ukrainas kanë thënë se evakuimet po vazhdojnë në disa zona të banuara në rajonin e Kievit, edhe pse trupat ruse sulmuan një konvoj me civilë në fshatin Peremoha, duke vrarë shtatë persona.
Ndërkaq, zëvendëskryetari i Mariupolit, Serhiy Orlov, tha se ende po pret që të arrijë konvoji që është nisur nga Zaporizhja, edhe pse tha se ai është duke lëvizur shumë ngadalë.
Zaporizhja është rreth tre orë larg nga Mariupoli. Zyrtarët thanë se konvoji ishte nisur rreth tetë orë më parë.
Por, Orlov tha se ende e ka të pamundur të konfirmojë raportimet e mediave ukrainase se forcat ruse po vidhnin furnizimet që ishin në këtë konvoj, që është nisur drejt qytetit të rrethuar të Mariupolit.
Mijëra banorë evakuohen nga qytete të ndryshme ukrainase
Afër 13,000 civilë ukrainas janë evakuuar përmes korridoreve humanitare gjatë të shtunës, dhe zëvendëskryeministrja e Ukrainës.
Ky numër i të evakuuarve është pothuajse dyfish më i lartë krahasuar me një ditë më parë.
Përmes një mesazhi të postuar online, zëvendëskryeministrja Iryna Vereshchuk tha sende askush nuk ka arritur të largohet nga qyteti i rrethuar i Mariupolit.
Ajo fajësoi forcat ruse për mosevakuimin e banorëve të këtij qyteti në jug të Ukrainës.
Më herët, Moska akuzoi forcat ukrainase se me qëllim nuk po lejojnë që qytetarët e Mariupolit të evakuohen.
Autoritetet lokale të Mariupolit kanë thënë se një konvoj me ndihma humanitare dhe autobusë për të evakuuar qytetarët është nisur nga Zaporizhja rreth tetë orë më parë, por ende nuk kanë informacione se ku gjendet aktualisht ky konvoj.
Zelensky bisedon me kryeministrin e Izraelit
Presidenti i Ukrainës, Volodymyr Zelenksy, ka biseduar të shtunën me kryeministrin e Izraelit, Naftali Bennett, për agresionin rus dhe për mundësitë e mbajtjes së bisedimeve të paqes.
“Ne duhet të ndalim represionin ndaj civilëve”, tha Zelensky.
Më herët gjatë së shtunës, Zelensky tha se është i gatshëm që të takohet me presidentin rus, Vladimir Putin, në Jerusalem, nën ndërmjetësimin e kryeministrit Bennett.
Ai tha se bisedimeve të paqes duhet t’i paraprijë një marrëveshje e armëpushimit.
Lexues të nderuar, këtu po e mbyllim mbulimin e drejtpërdrejtë të ngjarjeve në Ukrainë. Do të rikthehemi nga ora 07:00.
Ndërkaq, më poshtë mund të lexoni ngjarjet kryesore të ditës së 17-të të luftës në Ukrainë:
- Ukraina tha se afër 13,000 civilë u larguan nga qytetet e rrethuara përmes korridoreve humanitare. Por, në një fshat pranë Kievit, për shkak të sulmeve ruse, u vranë shtatë civilë, përfshirë edhe një fëmijë, teksa po tentonin që të evakuoheshin.
- Banorët e Mariupolit nuk kanë arritur të evakuohen dhe Kievi ka fajësuar Moskën se ka parandaluar largimin e qytetarëve përmes granatimeve
- Gjatë së shtunës ka pasur luftime të ashpra në disa qytete ukrainase. Në periferi të Kievit është raportuar për luftime, por po ashtu edhe në qytetin-port të Mariupolit. Forcat ruse kanë arritur të bëjnë përparim në Mariupolin e rrethuar, duke marrë nën kontroll disa pjesë në pjesën lindore të periferisë së këtij qyteti
- Presidenti ukrainas, Volodymyr Zelensky, ka thënë se afër 1,300 ushtarë ukrainas janë vrarë që prej nisjes së luftës. Ai ka pretenduar se forcat e shtetit të tij kanë vrarë 12,000 ushtarë rusë
- Zyrtarët ukrainas kanë thënë se janë të gatshëm për bisedime me Rusinë, por ata nuk do të dorëzohen. Presidenti ukrainas, Volodymyr Zelensky, madje ka thënë se është i gatshëm të takohet me Vladimir Putinin në Jerusalem, por ka shtuar se procesit të paqes duhet t’i paraprijë një marrëveshje e armëpushimit
- Shtetet e Bashkuara kanë ndarë edhe 200 milionë dollarë për ndihmë ushtarake për Ukrainën. Me fondet e reja, ndihma që Uashingtoni ka dhënë për Kievin brenda një viti ka arritur në 1.2 miliardë dollarë
- Liderët e Francës dhe Gjermanisë kanë kërkuar nga presidenti rus, Vladimir Putin, që të shpallë armëpushim të menjëhershëm. Nga Presidenca franceze kanë thënë se Putin duket se nuk është i gatshëm t’i japë fund luftës