Mirëmëngjesi për ju që na jeni bashkuar tani!
Këto janë zhvillimet e fundit rreth luftës në Ukrainë:
Sulmet afër kufirit të NATO-s: Zyrtarët ukrainas kanë thënë se forcat ruse kanë hedhur raketa në një bazë ushtarake në perëndim të Ukrainës, rreth 25 kilometra larg kufirit me Poloninë – vend anëtar i NATO-s. Nuk ka raportime për viktima në bazën në Javoriv, e cila gjendet afër qytetit të Lvivit. Kryetari i qytetit tjetër perëndimor, Ivano-Frankvisk, ka thënë se aeroporti i qytetit është sulmuar po ashtu.
Kievi: Banorët e kryeqytetit ukrainas janë zgjuar sërish nën zhurmën e sirenave. Transmetuesi britanik, BBC ka thënë se sulmet me artileri janë të vazhdueshme. Për më shumë sulme është raportuar në pjesën veriore të qytetit, ku po afrohen forcat ruse.
Zëvendësohet kryetari i “rrëmbyer”: Është raportuar se ushtria ruse ka instaluar një kryetare të re në qytetin Metitopol – pas dyshimeve për marrjen peng të kryetarit të qytetit ditën e shtunë. Galina Danilchenko është shfaqur në një televizion lokal duke iu bërë thirrje banorëve që të mos marrin pjesë në “veprime ekstremiste”.
Vazhdojnë evakuimet: Korridoret humanitare për t’iu ndihmuar njerëzve që të evakuohen nga rajonet e rrethuara të Ukrainës, janë duke funksionuar, ka thënë presidenti ukrainas, Volodymyr Zelensky. Numri i evakuimeve ditore ka arritur në rreth 13,000. Furnizimet humanitare në qytetin e Mariupolit pritet të arrijnë më vonë gjatë ditës së diel.
Ndërkohë në Uashington: Presidenti amerikan, Joe Biden, ka thënë se Shtetet e Bashkuara do të dërgojnë në Ukrainë armë të vogla, anti-tanke dhe armë tjera për mbrojtje kundër sulmeve ajrore në vlerë të 200 milionë dollarëve. Rusia ka paralajmëruar se mund të godasë këto furnizime.
Britania: Rusët po tentojnë të rrethojnë forcat ukrainase
Në përditësimin e fundit, Ministria britanike e Mbrojtjes ka thënë se forcat ruse janë duke tentuar të rrethojnë forcat ukrainase në lindje të shtetit, teksa avancojnë në drejtim të Harkivit në veri dhe Mariupolit në jug.
“Forcat ruse që po avancojnë nga Krimeja, janë duke tentuar të rrethojnë Mikollaivin, teksa tentojnë të nisen në perëndim drejt Odesas”, ka thënë Ministria britanike.
Ukraina: Instruktorë të huaj ushtarakë punojnë në bazën e sulmuar
Ministri i Mbrojtjes në Ukrainë, Oleksii Reznikov, ka thënë se instruktorë të huaj ushtarakë punojnë në një bazë ushtarake në Ukrainë, e cila është goditur nga Rusia.
“Informacioni për viktima është duke u verifikuar”, ka thënë Reznikov.
Një dëshmitar ka thënë për agjencinë e lajmeve, Reuters, se ka parë 19 ambulanca me sirena të lëshuara duke lëvizur nga drejtimi i bazës ushtarake.
“Ky është një tjetër sulm terrorist ndaj paqes dhe sigurisë afër kufirit të Bashkimit Evropian dhe NATO-s”, ka thënë Reznikov në Twitter.
Guvernatori: Nëntë të vdekur pas sulmit në bazën ushtarake
Nëntë persona kanë vdekur dhe 57 janë plagosur si pasojë e sulmit në një bazë ushtarake afër Lvivit, ka thënë guvernatori rajonal.
Ai ka thënë se Rusia ka hedhur 30 raketa në bazën ushtarake në Javoriv, sipas transmetuesit britanik, BBC.