Zjarrfikësit shpëtojnë banorët nga ndërtesat e djegura në Çernihiv
Në një video të publikuar nga Shërbimi Shtetëror i Emergjencës së Ukrainë, më 13 mars, shihet sesi ekipet e zjarrfikësve tentojnë të shuajnë zjarrin dhe të shpëtojnë banorët nga ndërtesat në Çernihiv, përmes daljeve të improvizuara. Lokacioni i videos është verifikuar nga ndërtesat, përfshirë ato që kanë qenë duke u ndërtuar para luftës, të cilat janë përputhur me pamjet satelitore.
Protesta kundër luftës në Rusi
Protesta kundër luftës janë duke u zhvilluar sërish në shumë vende të botës, përfshirë Rusinë – ku kritiku i burgosur i Kremlinit, Aleksei Navalny u ka bërë thirrje njerëzve që të dalin kundër presidentit rus, Vladimir Putin dhe pushtimit në Ukrainë.
Policia ka arrestuar disa persona në Sheshin Manezhnaya në qendër të Moskës.
Pamje tjera të protestave nëpër Evropë
Dhjetëra mijëra persona pritet të mblidhen të dielën nëpër qytete të Evropës për të protestuar kundër luftës në Ukrainë. Organizime të vogla janë duke u zhvilluar edhe në Rusi, pavarësisht shtypjes së këtyre protestave nga autoritetet. Shumë pjesëmarrës kanë mbajtur në duart mbishkrimet “Stop luftës” dhe “Paqe dhe solidaritet me popullin e Ukrainës”. Protesta planifikohet të ketë në Varshavë, Londër, Madrid, Frankfurt, Hamburg dhe Shtutgart.
Protestohet sërish kundër luftës
Zelensky: Ndihma për Mariupolin është prioritet i Ukrainës
Presidenti i Ukrainës, Volodymyr Zelensky, ka thënë se detyra më e rëndësishme tani është që Mariupoli i rrethuar të furnizohet me ndihma.
Ai ka thënë se konvoji humanitar është vetëm 80 kilometra larg qytetit, i cili është sulmuar vazhdimisht nga forcat ruse në javën e fundit.
“Ne jemi duke bërë gjithçka për të thyer rezistencën e pushtuesve, të cilët janë duke bllokuar edhe priftërinjtë e Kishës Ortodokse”, ka thënë Zelensky në një postim në Facebook.