Fushata vetjake e ish-pilotit sovjetik kundër luftës së Putinit
Volodymyr Bilevich ka shërbyer në forcën ajrore sovjetike dhe atë ruse. Por, kur Rusia pushtoi Ukrainën, piloti i pensionuar nisi një fushatë vetjake kundër luftës. Shërbimi rus i Radios Evropa e Lirë e ka shoqëruar Bilevichin, i cili është qytetar i Rusisë, por i kombësisë ukrainase, teksa ai doli nëpër rrugët e qytetit perëndimor rus Belgorod, afër kufirit me Ukrainën. Ky rrëfim është incizuar para se REL-i të detyrohej të ndërpriste punën në Rusi, më 6 mars, pas trysnisë së fortë nga qeveria ruse për të ndalur raportimin e pavarur atje.
Çekia dhe Sllovakia zotohen për dërgimin e armëve shtesë për Ukrainën
Republika Çeke do të dërgojë ndihmë shtesë ushtarake për Ukrainën, tha të dielën ministrja e Mbrojtjes, ndërkaq shteti fqinj, Sllovakia tha se po e shqyrton mundësinë e dërgimit të sistemeve të mbrojtjes ajrore në Kiev.
Ministrja e Mbrojtjes së Çekisë, Jana Cernochova, tha se shteti i saj, që është në NATO, veçse ka dërguar ndihmë ushtarake në vlerë prej 31.55 milionë dollarësh.
“Mendoj se, të paktën, do ta dyfishojmë këtë shifër”, tha ajo, duke mos dhënë detaje të tjera për dërgesat pasi u thirr në shqetësime të sigurisë.
Ndërkaq, në Sllovaki, anëtar i NATO-s, më 16 mars do të qëndrojë Sekretari amerikan i Mbrojtjes, Lloyd Austin.
Kryeministri i Sllovakisë, Eduard Heger, tha të dielën se gjatë kësaj vizite me gjasë do të diskutojnë për mundësinë e dërgimit në Ukrainë të sistemeve të mbrojtjes raketore S-300, që Sllovakia i ka në pronësi. Këto sisteme janë të prodhuara në kohën sovjetike.
*Lajmin e plotë mund ta lexoni KËTU
SHBA-ja zotohet se Rusia do të ketë pasoja pas vrasjes së gazetarit në Ukrainë
Këshilltari për Siguri Kombëtare, Jake Sullivan, tha se Shtetet e Bashkuara do të vendosin “pasoja të përshtatshme” ndaj Rusisë. Lajmi për vdekjen e gazetarit amerikan, Brent Renaud në Ukrainë, sipas tij ishte “shokues dhe i tmerrshëm”.
Ai tha se zyrtarët amerikanë po konsultohen me zyrtarët ukrainas për të përcaktuar se si ndodhi vrasja e gazetarit.
Qindra të arrestuar në Rusi në protestat kundër pushtimit të Ukrainës
Në disa qytete ruse janë duke u mbajtur protesta për të kundërshtuar pushtimin e paprovokuar të Ukrainës nga presidenti rus, Vladimir Putin.
Në këto protesta, deri më tani, janë arrestuar mbi 650 persona.
OVD-Info, që monitoron arrestimet në protesta, tha se deri në orën 17:00 sipas kohës lokale të Moskës, policia ka arrestuar 658 persona gjatë protestave në 35 qytete ruse. Të paktën, 289 prej tyre janë arrestuar në Moskë, tha kjo organizatë e pavarur.
*Lajmin e plotë mund ta lexoni KËTU