Vdiq shtatzëna që u plagos në maternitetin në Mariupol
Një grua shtatzënë, e plagosur nga bombardimet ruse në një maternitet në qytetin e Mariupolit, raportohet të ketë vdekur së bashku me foshnjën e saj.
Sulmi ndodhi të mërkurën e kaluar, kur u vranë edhe së paku tre persona të tjerë.
Pas sulmit, gruaja u dërgua në një spital tjetër.
Foshnja e saj lindi me prerje cezariane, por nuk dha shenja jete, thanë mjekët ukrainas për agjencinë e lajmeve Associated Press.
Pak kohë më vonë, sipas tyre, vdiq edhe nëna.
Mjekët thanë se nuk kanë pasur kohë ta merrnin emrin e gruas, përpara se burri dhe babai i saj të vinin për të marrë trupin e saj.
Në këtë fotogaleri mund të shihni pasojat e sulmit rus në spitalin e lindjes në Mariupol, më 9 mars:
Pasojat e sulmit rus ndaj spitalit të lindjes në Mariupol
Në foto: Brenda bisedimeve për paqe midis Ukrainës dhe Rusisë
Një nga negociatorët e Kievit ndau në Twitter një fotografi nga bisedimet që po zhvillohen midis Ukrainës dhe Rusisë, me qëllim ndaljen e konfliktit.
Rundi i katërt i bisedimeve po zhvillohet përmes video-konferencës.
Zyrtari ukrainas, Mykhailo Podolyak, tha se të dyja palët i kanë paraqitur tani pozicionet e tyre.
Më herët, ai tha se bisedimet do të fokusohen në vendosjen e armëpushimit në Ukrainë, tërheqjen e trupave ruse dhe garancitë e sigurisë për Ukrainën.
Kremlini mohon se i ka kërkuar ndihmë Kinës
Rusia nuk i ka kërkuar Kinës ndihmë ushtarake për aksionet e saj në Ukrainë, tha zëdhënësi i Kremlinit, Dmitry Peskov.
Sipas tij, Rusia “ka ka fuqi të mjaftueshme ushtarake për të përmbushur të gjitha synimet e saj në Ukrainë, në kohë dhe plotësisht”.
Zyrtarë të paidentifikuar u thanë mediave të shumta amerikane se Rusia i kërkoi Kinës pajisje ushtarake, përfshirë dronë.
Kjo bëri që SHBA-ja ta paralajmërojë Pekinin se do të përballet me “pasoja” të ashpra nëse mbështet Moskën.
Por, Kina po ashtu e mohoi kërkesën ruse, duke i cilësuar pohimet e zyrtarëve amerikanë si “dezinformata”.
Një zëdhënës i Ministrisë së Jashtme kineze e akuzoi Uashingtonin për përhapje të gënjeshtrave “dashakeqe” rreth rolit të Kinës në luftë.