Në pritje të seancës për votimin e Qeverisë së re...
Kuvendi i Kosovës pritet të mblidhet së shpejti në një seancë të re për votimin e Qeverisë së re të Republikës së Kosovës.
Lëvizja Vetëvendosje, si fituese e zgjedhjeve të 28 dhjetorit, bëri të ditur se ka dorëzuar te presidentja Vjosa Osmani propozimin për caktimin e Albin Kurtit si mandatar për formimin e qeverisë.
Deri tani, presidentja Osmani nuk ka dhënë ndonjë reagim të drejtpërdrejtë për këtë propozim; ajo vetëm ka uruar Albulena Haxhiun për zgjedhjen në krye të Kuvendit dhe ka bërë thirrje për bashkëpunim institucional.
Qëndroni me Radion Evropa e Lirë!
Abdixhiku: LDK do të jetë zë i arsyes dhe i stabilitetit institucional në Kuvend
Kryetari i Lidhjes Demokratike të Kosovës, Lumir Abdixhiku, tha se deputetët e LDK-së dhanë betimin e tyre në Kuvendin e Republikës së Kosovës, duke marrë përgjegjësi përpara qytetarëve dhe Kushtetutës.
Abdixhiku theksoi se përfaqësuesit e LDK-së do të nisin mandatin e tyre me përkushtim ndaj ligjshmërisë, demokracisë dhe interesit publik.
“LDK do të jetë zë i arsyes, i stabilitetit institucional dhe i shtetit funksional, në shërbim të Kosovës dhe qytetarëve të saj, në Kuvend dhe jashtë tij”, shkroi Abdixhiku në një postim në rrjetet sociale.
Osmani cakton Kurtin mandatar për formimin e Qeverisë së re
Presidentja e Kosovës, Vjosa Osmani, ka njoftuar sot se, në përputhje me Kushtetutën, ka caktuar Albin Kurtin si mandatar për formimin e Qeverisë së re të Republikës së Kosovës.
Osmani i ka uruar Kurtit suksese në udhëheqjen e qeverisë së re dhe punë në shërbim të qytetarëve të Kosovës.
“Ju priftë e mbara!”, shkroi presidentja në postimin e saj në Facebook.
Qeveria e re drejt votimit në Kuvend
Në ueb-faqen e Kuvendit të Kosovës shkruan se "seanca e jashtëzakonshme" mbahet në orën 20:00.
Nga kjo kohë kanë kaluar rreth 30 minuta dhe ende nuk dihet se kur do të mblidhen deputetët.