KQZ-ja nis publikimin e rezultateve
Komisioni Qendror i Zgjedhjeve nisi publikimin e rezultateve në ueb-faqen e tij zyrtare.
Me 173 vendvotime të procesuara, nga 2.498 gjithsej, Lëvizja Vetëvendosje prin me 36.22 për qind të votave.
Pas saj renditen: Partia Demokratike e Kosovës me 21.84%, Lidhja Demokratike e Kosovës me 16.26% dhe Aleanca për Ardhmërinë e Kosovës me 10.08%.
Për më shumë hollësi, klikoni këtu.
Haxhiu: Çdo votë duhet trajtuar me përgjegjësi të lartë
Ushtruesja e detyrës së presidentes së Kosovës, Albulena Haxhiu, tha se me mbylljen e qendrave të votimit, nis faza vendimtare e procesit zgjedhor - numërimi i votave.
Ajo tha se çdo votë përfaqëson vullnetin e qytetarëve dhe duhet të trajtohet me përgjegjësinë më të lartë.
Përmes një postimi në Facebook, Haxhiu u bëri thirrje personave përgjegjës që të angazhohen me përkushtim, vigjilencë dhe profesionalizëm në mbrojtjen e integritetit të procesit zgjedhor, duke uruar që rezultati përfundimtar të pasqyrojë besnikërisht vullnetin e qytetarëve.
Radoniqi: Procesi zgjedhor ishte i rregullt
Kryetari i Komisionit Qendror të Zgjedhjeve, Kreshnik Radoniqi, tha se procesi zgjedhor më 7 qershor është zhvilluar në mënyrë të rregullt dhe pa incidente që do të cenonin mbarëvajtjen e tij.
Sipas të dhënave preliminare, ai tha se të drejtën e votës e kanë shfrytëzuar 712.148 qytetarë, ose 36.33 për qind e trupës zgjedhore.
Për krahasim, në zgjedhjet e 28 dhjetorit 2025, votuan 44.99 për qind.
