Rezultatet e deritashme, sipas KQZ-së:
Me mbi 98 për qind të votave të numëruara, Lëvizja Vetëvendosje ka siguruar 43.04%; Partia Demokratike e Kosovës 21.11%; Lidhja Demokratike e Kosovës 17.68%; Aleanca për Ardhmërinë e Kosovës 7.21% dhe Lista Serbe 5.92%.
Osmani: LVV s’ka arsye ta refuzojë emrin tim për presidente
Ish-presidentja Vjosa Osmani, e cila ishte bartëse e listës së Lidhjes Demokratike të Kosovës dhe kandidate e partisë për presidente, ka falënderuar qytetarët për mbështetjen në zgjedhje, duke e cilësuar rezultatin për LDK-në si fillim të një faze të re për subjektin politik.
Ajo ka deklaruar se Lëvizja Vetëvendosje nuk ka asnjë arsye për ta refuzuar emrin e saj për postin e presidentes.
"Ajo ka mijëra arsye të thotë 'po' dhe të gjitha ato janë për interesa të shtetit të Kosovës", ka thënë Osmani në një konferencë për media, bashkë me kryetarin e LDK-së, Lumir Abdixhiku.
Ajo ka shtuar se angazhimi i partisë do të përqendrohet që nga dita e nesërme në ndërtimin e institucioneve funksionale dhe në ofrimin e stabilitetit për vendin.
Me numërimin e mbi 97% të votave, LDK-ja ka fituar 17.68%, krahasuar me 13.2% sa ka fituar në zgjedhjet e 28 dhjetorit 2025.
Osmani ka theksuar se vota e qytetarëve ka ndihmuar në ribalancimin e skenës politike dhe në refuzimin e përçarjeve, duke e cilësuar këtë si një mesazh të qartë për të ardhmen politike të vendit.
"Ky është vetëm hapi i parë drejt ringritjes", është shprehur Osmani, duke shtuar se LDK-ja do të vazhdojë të forcohet në muajt dhe vitet në vijim.
Abdixhiku: LDK-ja shënoi rritjen më të madhe
Kryetari i Lidhjes Demokratike të Kosovës, Lumir Abdixhiku, ka deklaruar në një konferencë për media se LDK-ja ka shënuar rritjen më të madhe ndër subjektet politike në këto zgjedhje, duke e cilësuar këtë si mbështetje për vizionin e partisë.
Ai ka thënë se me 20 mandate, LDK-ja është stabilizuar dhe ka një të ardhme të sigurt, ndërsa këtë rezultat e ka quajtur edhe përgjegjësi politike për veprimet e mëtejshme.
Abdixhiku ka vlerësuar se gara zgjedhore nuk ka qenë e barabartë, duke përmendur propagandë, presion dhe fushatë me gjuhë të ashpër, por ka shtuar se qytetarët “kanë dhënë përgjigje” duke i refuzuar këto praktika dhe duke kërkuar kompromis dhe stabilitet institucional.
