Kurti shpall fitoren dhe shpreh gatishmëri për bashkëpunim me partitë tjera

Kandidati për kryeministër nga Partia Demokratike e Kosovës, Bedri Hamza, ka vlerësuar se qytetarët e Kosovës kanë treguar qytetari, përgjegjësi dhe kulturë demokratike gjatë procesit zgjedhor.

Ai ka thënë se në një proces të qetë dhe dinjitoz, qytetarët kanë dëshmuar besimin e tyre në fuqinë e votës dhe në të drejtën për të vendosur për të ardhmen e vendit.

Hamza ka falënderuar pjesëmarrësit në zgjedhje, si dhe institucionet, komisionerët, vëzhguesit, mediat dhe forcat e rendit për angazhimin e tyre në mbarëvajtjen e procesit.

Ai ka theksuar se është me rëndësi që çdo votë të numërohet me kujdes dhe të respektohet plotësisht vullneti i qytetarëve, duke shtuar se demokracia nuk përfundon me votim, por me respektimin e tij.

Kryetari i Aleancës për Ardhmërinë e Kosovës, Ardian Gjini, ka falënderuar qytetarët për pjesëmarrjen në zgjedhje, duke thënë se ata kanë shprehur vullnetin e tyre përmes votës.

Ai u ka bërë thirrje komisionerëve dhe vëzhguesve që të jenë korrektë gjatë procesit të numërimit, në mënyrë që, siç ka thënë ai, vullneti i qytetarëve i vendosur në kutitë e votimit, të pasqyrohet saktë dhe të mos përsëriten gabimet e së kaluarës.

Gjini ka theksuar se vetëm përmes një procesi të drejtë mund të garantohet respektimi i vullnetit të sovranit, duke e konsideruar këtë thelbësore për demokracinë.

Policia e Kosovës ka njoftuar se procesi zgjedhor në vend ka kaluar në mënyrë të qetë dhe pa incidente serioze, falë zbatimit të planit operativ dhe bashkëpunimit ndërinstitucional.

Sipas Policisë, gjatë ditës së zgjedhjeve janë angazhuar rreth 6.300 zyrtarë policorë dhe qindra patrulla për të garantuar sigurinë dhe mbarëvajtjen e procesit.

Në bashkëpunim me Prokurorinë e Shtetit janë iniciuar 17 raste penale që lidhen me procesin zgjedhor, ndërsa 5 persona të dyshuar janë dërguar në mbajtje.

Po ashtu, janë trajtuar 53 informata të ndryshme, por pa elemente që do të çonin në procedura të mëtejshme ligjore.