Prokurori i Shtetit: Pesë persona të ndaluar për vepra kundër të drejtës së votimit
Prokurori i Shtetit ka bërë të ditur se, deri në këtë fazë të procesit zgjedhor, janë ndaluar pesë persona për vepra penale kundër të drejtës së votimit, ndërsa 12 të tjerë janë liruar në procedurë të rregullt.
Sipas njoftimit, janë trajtuar disa informata në nivel vendi, prej të cilave 17 raste janë vlerësuar si të lidhura me vepra penale zgjedhore, në qytete të ndryshme të Kosovës.
Në proces janë angazhuar mbi 100 prokurorë dhe staf mbështetës, të cilët do të vazhdojnë të kujdestarojnë edhe gjatë numërimit të votave.
Si janë rezultatet e deritashme në kryeqytet?
Me mbi 62 për qind të votave të numëruara në Prishtinë, Komisioni Qendror i Zgjedhjeve bën të ditur se Lëvizja Vetëvendosje prin me 49.95%, Lidhja Demokratike e Kosovës me 24.48%, Partia Demokratike e Kosovës me 18.07% dhe Aleanca për Ardhmërinë e Kosovës me 4.66%.
Vazhdoni të përcillni Radion Evropa e Lirë për lajme në kohë reale.
Demokracia në Veprim publikon rezultatet preliminare
Organizata Demokracia në Veprim publikoi rezultatet preliminare të zgjedhjeve të 7 qershorit, bazuar në të dhënat e mbledhura nga vëzhguesit e saj.
Sipas këtyre rezultateve, Lëvizja Vetëvendosje prin me 42.7 për qind të votave, me një marzh gabimi prej 1.7 për qind.
Partia Demokratike e Kosovës renditet e dyta me 21.5 për qind, me marzh gabimi 1.6 për qind, ndërsa Lidhja Demokratike e Kosovës është e treta me 17.7 për qind dhe marzh gabimi 1.1 për qind.
Aleanca për Ardhmërinë e Kosovës mori 7.1 për qind të votave, po ashtu me marzh gabimi 1.1 për qind.
Këto rezultate nuk përfshijnë votat me kusht dhe ato të diasporës.
Gjini: Do të punojmë që vota e AAK-së të respektohet
Kryetari i Aleancës për Ardhmërinë e Kosovës, Ardian Gjini, deklaroi në një konferencë për media se partia e tij do të punojë që vota e qytetarëve që kanë mbështetur AAK-në, të respektohet plotësisht.
Ai tha se ajo që përfaqëson AAK-ja “patjetër që një ditë do të fitojë”, duke shprehur besim në të ardhmen politike të subjektit.
Gjini mori drejtimin e Aleancës për Ardhmërinë e Kosovës vetëm pak kohë më parë, duke pasuar kryetarin e deritanishëm, Ramush Haradinaj, i cili e udhëhoqi partinë për më shumë se dy dekada.
Me mbi 90% të votave të numëruara, AAK-ja mori 7.28% në zgjedhjet e 7 qershorit - rezultat dukshëm më i lartë se në zgjedhjet e 28 dhjetorit, kur kishte fituar 5.5%.
