Ligjvënësit në Kosovë kanë dështuar t’i zgjedhin dy gjyqtarë të rinj në gjykatës më të lartë të vendit, e cila është duke punuar me minimumin e lejuar të gjyqtarëve, gjatë një seance të premten, duke e kthyer konkursin në pikën zero.
Gjashtë kandidatë ishin në garë për dy vende të lira si gjyqtarë në Gjykatën Kushtetuese të Kosovës, por asnjëri prej tyre nuk i mori votat e nevojshme për t’u emëruar.
Në rundin e katërt dhe të fundit të votimit të fshehtë, Jorida Xhafaj i mori 62 vota, Emine Abdyli-Pozhari 60 dhe Flamur Mrasori 51. Sipas, Kushtetutës 2/3 e deputetëve duhet të jenë të pranishëm dhe të votojnë.
Kryetarja e Kuvendit, Albulena Haxhiu, i kërkoi Komisionit të Posaçëm për shqyrtimin e kandidatëve për anëtarë të Gjykatës Kushtetuese ta rishpallë konkursin për dy gjyqtarët e rinj, dhe e mbylli seancën e së premtes.
Benina Kusari, Shpresa Emra dhe Zahir Çerkini, të cilët ishin në garën e ngushtë, u eliminuan në rundet e mëhershme.
Kushtetuesja përbëhet nga nëntë gjyqtarë, por tash e një kohë ajo është duke vepruar me vetëm shtatë sosh, që është minimumi që i mundëson asaj të jetë funksionale.
Gjykata Kushtetuese është kontrolli më i lartë mbi pushtetin legjislativ dhe ekzekutiv në Kosovë, dhe është arbitri më i lartë për interpretimin e dispozitave kushtetuese për mbrojtjen e të drejtave dhe lirive të njeriut në vend.
Në përgjithësi, 25 kandidatë garuan për dy vende në gjykatën më të lartë të vendit në prill.
Ata u intervistuan me gojë nga Komisioni i Posaçëm për shqyrtimin e kandidatëve për anëtarë të Gjykatës Kushtetuese dhe u vlerësuan me pikë nga 5 deri në 10. Procesi u vëzhgua nga organizatat e shoqërisë civile.
Sipas ligjit, procedura për emërimin e gjyqtarit të ri fillon të paktën tre muaj para përfundimit të mandatit të rregullt të gjyqtarit paraprak.
Gjyqtarët e përzgjedhur nga Komisioni i Posaçëm duhet të votohen më pas nga Kuvendi, para se të emërohen nga presidenti i Kosovës dhe ta bëjnë betimin para fillimit të mandatit.