Mbrojtja: Selimi është i pafajshëm
Avokati i Selimit, Geoffrey Roberts, në fillim të fjalës tha se ZPS-ja nuk ka arritur të vërtetojë asnjë nga krimet që i ngarkohen klientit të tij.
“Selimi është tërësisht i pafajshëm për të gjitha krimet në aktakuzë. ZPS-ja thjesht nuk ka arritur të provojë asnjë prej këtyre krimeve të pretenduara. Kaq është dhe ky është qëndrimi ynë”, tha ai.
Avokati: ZPS mbështetet në një intervistë që Selimi dha për ta
Avokati Geoffrey Roberts tha se ZPS-ja mbështetet tek një intervistë që Selimi kishte dhënë për ta. Por, ai argumentoi se ky rrëfim nuk u bë nën betim dhe ai mund të ketë gabime.
“Duke qenë se ai po merrej në pyetje për ngjarje para 20 vitesh, ai u përgjigj pa referenca dhe burime materiale. Mund të ketë gabime”, tha ai.
Ai paralajmëroi trupin gjykues se kjo intervistë dhënë ZPS-së mund të minojë peshën që ajo të merret si provë e besueshme.
“Selimi nuk po akuzohet mbi një rrëfim që mund të jetë i besueshëm. Gabimet, lëshimet në kujtesën e tij mund të ketë dhe minojnë peshën që duhet t’i jepet kësaj prove”, tha Roberts.
Roberts: Nuk ka ekzistuar ndonjë ndërmarrje e përbashkët kriminale
Avokati Roberts tha se qëndrimi i mbrojtjes është që nuk ka ekzistuar Ndërmarrja e Përbashkët Kriminale, ku ka qenë i përfshirë Selimi apo të akuzuarit e tjerë në asnjë periudhë të aktakuzës, siç pretendon Prokuroria.
“Në mungesë të NPK-së nuk mund të ketë përgjegjësi për Selimin për kryerjen e krimeve”, tha ai.
Sipas tij, pretendimi i ZPS-së për një ndërmarrje të tillë “është i mangët në logjikë dhe i mangët në prova dhe kjo shihet në çdo aspekt”.
Mbrojtja: ZPS pretendon se të akuzuarit nuk kishin për synim çlirimin e Kosovës, por pushtetin
Avokati Roberts tha se pretendimi kryesor i Prokurorisë është se të akuzuarit së bashku me anëtarët e tjerë të asaj që e cilëson si ndërmarrje të përbashkët kriminale kishin për qëllim marrjen nën kontroll të Kosovës dhe largimin e kundërshtarëve.
“Në vetvete qëllimi për marrjen nën kontroll Kosovën nuk është kriminal, por mënyrë për t’i dhënë fund shtypjes së Millosheviqit”, tha ai.
“Duhet të konstatoni se ka pasur një pajtim për krimet e pretenduara. Çështja e objektivit jokriminal, teoria e Prokurorisë është se ky ishte qëllimi kryesor i të akuzuarve dhe jo çlirimi i popullit të tyre, por vetëm synim për të marrë pushtet në mënyrë egoiste”, shtoi Roberts.