Vonesë në nisje të seancës
Ndonëse seanca është thirrur në orën 10:00 tashmë është bërë praktikë që ato të nisin me vonesë.
Njohës të çështjeve politike e kanë kritikuar disa herë këtë qasje të deputetëve, duke e konsideruar mosrespekt ndaj institucioneve shtetërore dhe publikut.
Haradinaj: Mund të ketë votim të fshehtë për një Qeveri të pazareve
Deputeti i zgjedhur nga Aleanca për Ardhmërinë e Kosovës, Daut Haradinaj, ka thënë se edhe pse nuk beson se “do të ketë zgjidhje” për të formuar një Qeveri të re sot, kjo gjë mbetet të shihet sot gjatë seancës.
Por, ai shtoi se edhe nëse do të arrihen numrat për të formuar Qeverinë e re, “ kjo do të jetë një Weveri e pazareve e jo e programeve”.
“Nëse kanë arritur gjatë natës me pazare individuale, atëherë mbetet të shihet. Sa kam informata, do të tentohet me votim të fshehtë”, tha Haradinaj.
Ai aludoi në deklarimet që kanë bërë përfaqësues të Lëvizjes Vetëvendosje më parë se do të tentojnë të sigurojnë 61 votat e nevojshme përmes marrëveshjeve individuale me deputetë.
Deputetë të Listës Serbe nuk deklarohen për media
Deputetët e Listës Serbe, partisë më të madhe të serbëve në Kosovë, janë parë hyrë në Kuvendin e Kosovës për të marrë pjesë në seancën e thirrur në orën 10:00, por nuk janë deklaruar për media.
Ata kanë dërguar lëndë në Gjykatën Kushtetuese meqë vlerësojnë se zgjedhja e Nenad Rashiqit si nënkryetar serb, nuk është në linjë me Kushtetutën dhe rregulloret e Kuvendit.
Rashiq i takon Partisë për Liri, Drejtësi dhe Mbijetesë.
Murati: Sot ose do të kemi “Kurti 3” ose do të shkojmë në zgjedhje
Deputeti i Lëvizjes Vetëvendosje, Hekuran Murati, ka lënë të kuptohet se partia e tij nuk ka arritur t'i sigurojë votat e mjaftueshme deri më tash për të formuar Qeverinë e re.
Përmes një statusi të postuar në Facebook, ai shprehu shpresën se deputetët e opozitës do të votojnë pro.
“A janë të gatshëm deputetët e opozitës që ta çojë vendin në zgjedhje dhe të rrezikojnë qëndrushmërinë e shtetit vetëm e vetëm për ta kundërshtuar Albin Kurtin? Uroj që sot të triumfojë arsyeja dhe vullneti politik tek secili deputet për të zgjedhur interesin shtetëror para së gjithash”, shkroi Murati.
Ai tha se sot janë dy opsione: formimi i Qeverisë së re ose do të shkohet në zgjedhje.
Sipas tij, për LVV-në, opsioni i preferuar është formimi i Qeverisë së re.