Berisha: Nëse varet nga vota ime, unë do ta zhbllokoj
Deputeti Veton Berisha, nga Partia Liberale Egjiptiane, ka thënë se ai do të votojë pro Qeverisë së re nëse formimi ose jo i kësaj Qeverie varet nga vota e tij.
I pyetur nga gazetarët para hyrjes në Kuvendin e Kosovës, ai tha se është takuar mbrëmë me mandatarin Albin Kurti nga Lëvizja Vetëvendosje, dhe se pret të shohë se çfarë do të shpalosë ai sot në Kuvend.
“Nëse varet nga vota ime, unë do ta zhbllokoj”, tha Berisha.
Ai dhe deputetja boshnjake Duda Bale janë dy nga tre deputetët që përfaqësojnë pakicat joserbe në Kuvendin e Kosovës që kanë shprehur më shumë skepticizëm për një Qeveri të re. Bashkë me ta është edhe deputeti goran Adem Hoxha.
Në sallë edhe deputetët e LVV-së dhe PDK-së
Tashmë janë duke hyrë në sallë edhe deputetët e Lëvizjes Vetëvendosje dhe ata të Partisë Demokratike të Kosovës.
Seanca mund të fillojë shpejt!
Disa deputetë mbërrijnë në sallë, votimi në mënyrë elektronike
Mbi dhjetë minuta pas orarit kur seanca e sotshme pritej të niste, tash në sallë kanë mbërritur disa prej deputetëve.
Në sallë shihen deputetët e Lidhjes Demokratike të Kosovës, Aleancës për Ardhmërinë e Kosovës dhe Nismës Socialdemokrate.
Në secilën ulëse të sallës tashmë janë shpërndarë disa fleta ku deputetët udhëzohen se si të votojnë përmes sistemit elektronik, duke lënë të kuptohet që këtë herë votimi s’do të bëhet me ngritje të dorës, por në mënyrë elektronike.
Limaj: Nuk kam ndryshuar qëndrim
Kryetari i Nismës Socialdemokrate, Fatmir Limaj ka thënë se nuk ka ndryshuar qëndrim lidhur me votën për Lëvizjen Vetëvendosje sot në Kuvend.
Ai ka thënë se nuk është kontaktuar në ditët e fundit nga kjo parti.
Limaj ka thënë disa herë se është i gatshëm të bashkëpunojë me çdo parti që të kontribuojë në Kuvend, por nuk është i interesuar që të jetë pjesë e ndonjë përbërjeje qeveritare.
Megjithatë, me raste ai ka deklaruar edhe që nuk do të lejonte që shteti të shkonte në zgjedhje të reja.
Partia e tij i ka tre deputetë në Kuvend.
