Kurti nuk i siguron votat për Qeveri të re

26 tetor 2025

• Albin Kurti, kryeministër në detyrë dhe mandatar për të formuar Qeverinë e re, nuk i ka siguruar 61 votat e nevojshme për të nisur një mandat të ri në pushtet.

• Tani i takon presidentes së Kosovës, Vjosa Osmani që të vendosë për hapat e mëtejmë.

• Partitë e mëdha shqiptare, Partia Demokratike e Kosovës dhe Lidhja Demokratike e Kosovës, kanë thënë paraprakisht se s'kanë votë për Kurtin dhe e kanë akuzuar atë për bllokim të shtetit prej zgjedhjeve parlamentare të 9 shkurtit. Sipas tyre, mundësia e vetme për stabilitet janë zgjedhjet e reja.

• Kriza institucionale rrezikon t’i kushtojë Kosovës miliona euro, ndërsa faktori ndërkombëtar ka bërë thirrje të vazhdueshme që të krijohen institucionet për të ruajtur stabilitetin shtetëror.

11:11 26.10.2025

Kurti në sallë

Pas më shumë se një ore vonesë, mandatari për të formuar Qeverinë, Albin Kurti ka hyrë në sallën e Kuvendit.

Ai është parë në duar me një dosje, që mund të jetë e prezantimit të përbërjes së re qeveritare.

Ende është e paqartë nëse i ka votat e nevojshme - 61 sosh - për një mandat të ri në krye të Qeverisë.

11:01 26.10.2025

Diskutime deri në minutën e fundit

Derisa jemi në pritje të nisjes së seancës, deputetë të Lëvizjes Vetëvendosje janë në lëvizje të vazhdueshme.

Ata shihen grupe-grupe duke diskutuar edhe me deputetë të partive tjera të mëdha shqiptare, dhe dalin e hyjnë në sallën e Kuvendit.

Kryetari i tyre, Albin Kurti, vazhdon të mos jetë në sallë.

10:49 26.10.2025

Kurti nuk është ende në sallë

As mandatari për të formuar Qeverinë e re, Albin Kurti dhe as kryetari i Kuvendit, Dimal Basha nuk janë në sallën e Kuvendit.

Ora është 10:49 dhe seanca nuk ka nisur ende.

10:37 26.10.2025

Pamje nga Kuvendi

Kameramani i Radios Evropa e Lirë, Ibrahim Berisha është në sallën e Kuvendit dhe këto janë pamjet që i ka shkrepur ai:

Shfaq më shumë