Donald Trump zgjidhet presidenti i 47-të i Shteteve të Bashkuara

5 nëntor 2024

Donald Trump është zgjedhur presidenti i 47-të i Shteteve të Bashkuara.
Ai ka siguruar 295 prej 270 votave të nevojshme të Kolegjit Elektoral për t'u shpallur president.
Trump është zotuar se do ta "shërojë" kombin, teksa u është drejtuar mbështetësve nga Florida.
Në garën e 5 nëntorit ishin demokratja Kamala Harris, aktualisht nënpresidente, dhe republikani Donald Trump, president nga viti 2017 deri më 2021.
Zgjedhja e Amerikës do t’i formësojë padyshim politikat globale, në kohën kur bota përballet me tensione në rritje dhe sfida komplekse të sigurisë.

08:07 6.11.2024

Mirëmëngjesi të gjithëve nga unë, Krenarja!

Do të jemi së bashku përgjatë ditës 😊

Jemi në pritje të deklarimit të paralajmëruar të kandidatit të republikanëve, Trump.

Kandidatja e demokratëve, Harris, nuk do të deklarohet tani për tani.

Faleminderit që jeni me ne!

07:55 6.11.2024

Të dashur lexues,

Mbulimin direkt të zgjedhjeve në SHBA prej tash e merr Krenare Cubolli.

Faleminderit që na ndiqni!

Ditë të mbarë nga unë Valona Tela.

07:48 6.11.2024

Trump pritet t’u drejtohet mbështetësve

Kandidati republikan për president, Donald Trump, pritet të flasë nga selia e fushatës së tij në Floridë.

Mijëra mbështetës janë mbledhur tashmë aty.

Rezultatet e deritashme të zgjedhjeve e nxjerrin Trumpin në epërsi kundrejt kandidates demokrate, Kamala Harris.

Deri më tash, ai ka siguruar 246 vota të Kolegjit Zgjedhor nga minimumi prej 270 sa i duhen për t’u shpallur president.

07:25 6.11.2024

“Rrugës drejt një fitoreje të bukur” - kështu tha kryeministri i Hungarisë, Viktor Orban, teksa komentoi zgjedhjet në SHBA në një postim në Facebook.

Orban ka mbështetur hapur garën e Trumpit për president të SHBA-së.