Shkon në 33 numri i të infektuarve në Shqipëri
Ministria e Shëndetësisë e Shqipërisë ka bërë të ditur se numri i të infektuarve me koronavirus në këtë vend ka arritur në 33.
Zëvendësministrja e Shëndetësisë, Mira Rakacolli, ka thënë se nga 33 të prekurit, 8 janë të shtruar në Spitalin Infektiv (nga Tirana, Durrësi, Fieri dhe Rrogozhina) dhe 25 të tjerë janë të vetizoluar në shhtëpi, në gjendje të mirë shëndetësore.
Ndër të prekurit me sëmundjen që shkakton koronavirusi, COVID-19, është edhe një mjek.
Në shumicën e qyteteve të Shqipërisë janë ndaluar hyrje-daljet e banorëve, si masë për pengimin e përhapjes së koronavirusit.
Kryeministri i Shqipërisë, Edi Rama, ka dhënë urdhër që policia, bashkë me ushtrinë, të dalin nëpër rrugë dhe të sigurojnë se njërëzit po vetëkarantinohen dhe se nuk përbëjnë rrezik për të tjerët.
Për më shumë lexoni këtu.
Stafi i repartit të emergjencës në Viti në karantinë
Reparti i emergjencës në Komunën e Vitisë, në Kosovë, është dezinfektuar në tërësi mëngjesin e së premtes, pas dyshimeve se një person që është vizituar aty, mund të jetë i prekur me koronavirus.
Ky person, i moshës rreth 80-vjeçare, ka ardhur në Kosovë nga Italia ditë më parë.
Vjollca Kadolli, drejtoreshë e Qendrës Kryesore të Mjekësisë Familjare në Viti, i ka informuar institucionet gjegjëse se stafi mjekësor që ka qenë në kontakt me ambientin ku është ekzaminuar i infektuari i dyshuar, është në karantinë.
Pasditen e së premtes priten të dalin rezultatet nëse personi i dyshuar është i prekur me koronavirus ose jo.
“Nëse personi është prekur me virus, atëherë mostrat do t’i merren edhe stafit mjekësor dhe të gjithë atyre që kanë pasur kontakt me personin e dyshuar”, ka thënë Faik Hoti, nga Ministria e Shëndetësisë.
Në Kosovë ende nuk është konfirmuar asnjë rast me koronavirusin e ri, derisa janë testuar rreth 90 persona si të dyshuar.
BE-ja kundër mbylljes së kufijve
Bashkimi Evropian i paralajmëroi vendet anëtare kundër mbylljes së njëanshme të kufijve, si masë për të luftuar pandeminë e koronavirusit.
Presidentja e Komisionit Evropian, Ursula von der Leyen, tha se “ndalesat e përgjithshme të udhëtimeve nuk konsiderohen si masa më efektive nga Organizata Botërore e Shëndetësisë”.
Von der Leyen sugjeroi kontrollet e njerëzve në kufij.
Reagimi i saj vjen pasi Çekia i është bllokuar Sllovakisë fqinje në mbylljen e kufijve për të huajt, përveç atyre që kanë leje banimi.
Republika Çeke mbyll kufijtë
Në kuadër të masave për parandalimin e përhapjes së koronavirusit, Qeveria e Çekisë ka marrë vendim që, nga e hëna, t’iu ndalojë shtetasve çekë dhe të huajve me leje të përkohshme ose të përhershme banimi, të largohen nga Republika Çeke.
Sipas vendimit, asnjë i huaj po ashtu nuk do të lejohet të hyjë në vend.
Nga e premtja, 13 mars, karantina e detyrueshme do të zbatohet për të gjithë njerëzit që hyjnë në Çeki nga 18 vende: Austria, Belgjika, Kina, Danimarka, Franca, Gjermania, Greqia, Irani, Italia, Japonia, Holanda, Norvegjia, Koreja e Jugut, Spanja, Suedia, Zvicra, Mbretëria e Bashkuar dhe Shtetet e Bashkuara.
Republika Çeke ka aktualisht 117 njerëz të infektuar me koronavirus.