Gati 100 të vdekur brenda ditës nga koronavirusi në Iran
Irani ka thënë të shtunën se koronavirusi në këtë shtet ka lënë të vdekur 97 persona, duke dërguar numrin e viktimave në 611.
Ky shtet është duke u përballur me shpërthimin më të keq të virusit në Lindje të Mesme, pasi është thënë se 12,729 persona janë prekur nga kjo sëmundje.
Megjithatë, ka shqetësime se numri i të infektuarve në Iran është shumë i madh sesa ai për të cilin është raportuar nga zyrtarët qeveritarë.
Po ashtu ende nuk dihet nëse spitalet lokale kanë kapacitete për t’u përballur me fluksin e ri të rasteve, pasi më shumë se 2,500 persona është bërë e ditur se janë infektuar në vetëm dy ditët e fundit.
Televizioni shtetëror ka raportuar më herët gjatë javës se spitalet në disa zona janë të stërmbushura me pacientë.
Autoritetet janë zotuar për të krijuar klinika mobile, mirëpo ende nuk kanë prezantuar shifra se sa persona kanë nevojë të shtrihen nëpër spitale.
Mbi 21,000 të infektuar me koronavirus në Itali
Italia ka raportuar rritjen më të madhe të numrit të të infektuarve nga dita në ditë me koronavirusin e ri.
Autoritetet kombëtare të shëndetësisë u kanë thënë gazetarëve se kanë regjistruar 3,497 raste në 24 orët e fundit.
Kjo shifër nënkupton 20 për qind rritje të numrit të rasteve nga një ditë në tjetrën.
Pak më shumë se gjysma e këtyre rasteve janë raportuar në Lombardi, rajonin verior të Italisë, që është prekur më së keqi në Evropë nga ky virus.
Numri i të prekurve me këtë sëmundje në Itali ka arritur në 21,156.
Pesë raste të reja me koronavirus në Serbi
Serbia ka njoftuar për pesë raste të reja me koronavirus, duke dërguar në 46 numrin e të prekurve me këtë sëmundje.
Sipas ministrit serb të Shëndetësisë, Zllatibor Lonçar, tre prej të prekurve janë lëshuar në shtëpi, derisa dy të tjerë janë në spital, por gjendja e tyre është stabile.
Arrin në 18 numri i të infektuarve me koronavirus në Maqedoni të Veriut
Në Maqedoninë e Veriut janë regjistruar edhe gjashtë raste të reja me koronavirus, duke e çuar në 18 numrin e përgjithshëm të të prekurve sëmundja Covid-19.
Ministri i Shëndetësisë, Venko Filipce, i cili udhëheq grupin e krizës, ka thënë se të infektuarit janë persona të kthyer në vend nga shtetet me rrezik të lartë. Gjithsej ishin testuar 12 persona, gjashtë prej të cilëve kanë dalë me rezultate pozitive.
Detajet tjera i kuptoni këtu.