Në mbarë botën shtohen masa kundër përhapjes së koronavirusit
Autoritetet në mbarë botën po ndërmarrin masa gjithnjë e më drastike, në përpjekje për të ngadalësuar përhapjen e koronavirusit të ri, me vendime për izolime dhe kufizime të udhëtimit.
- Në aeroportet e SHBA-së, udhëtarët që ktheheshin nga Evropa u ballafaquan me pritje të gjata.
- Ushtarët dhe policia u vendosën në rrugët e kryeqytetit të populluar në Filipine.
- Franca urdhëroi mbylljen e pothuajse të gjithçkaje që vizitohet nga njerëzit e vendeve tjera - Kulla Eifel, Louvre, kafenetë dhe restorantet . Qeveria fanceze mori masa gjithnjë e më të ashpra për të pamundësuar kontaktin e afërt mes njerzve.
- Çekia ka paralajmëuar se do të vendosë izolim të plotë për gjithë vendin.
- Në Kinë, ku virusi u zbulua për herë të parë në dhjetor, njerëzit që mbërritën pëmes fluturime nga vendet tjera u dërguan në një qendër të improvizuar për kontrolle fillestare përpara se të transferoheshin në shtëpitë e tyre ose në vende të tjera karantine.
- Në Lindjen e Mesme, autoritetet myslimane njoftuan se xhamia Al-Aksa e Jeruzalemit, vendi i tretë i shenjtë i Islamit, do të mbyllet për shkak të shqetësimeve për përhapjen e koronavirusit.
- Në Itali, vendi më i goditur në Evropë, numri i vdekjeve u rrit në 1400 dhe infeksionet në më shumë se 21,000 për shkak të asaj që autoritetet e karakterizuan si sjellje të papërgjegjshme nga njerëzit që ende shoqërohen, pavarësisht izolimit mbarëkombëtar.
- Në Britani, numri i vdekjeve gati u dyfishua nga një ditë më parë, në 21, dhe numri i njerëzve të infektuar u rrit në mbi 1100.
- Greqia raportoi për 230 raste me infeksion dhe tri vdekje. Policia atje arrestoi 45 pronarë dyqanesh për shkeljen e një vendimi për mbylljen e bizneseve.
- Danimarka mbylli kufijtë e saj dhe ndaloi trafikun e pasagjerëve me vendet tjera.
- Polonia mbylli kufijtë në mesnatë dhe ndaloi hyrjen e të huajve përveç nëse ata jetonin në Poloni ose kishin lidhje personale atje.
- Rusia tha se kufijtë e saj me Norvegjinë dhe Poloninë do të jenë të mbyllura për shumicën e të huajve duke filluar nga e diela.
- Australia dhe Zelanda e Re njoftuan se udhëtarëve që vijnë do t'u kërkohet të izolohen për 14 ditë, me pak përjashtime.
Rritet numri i vdekjeve në Iran
Irani tha të dielën se në 24 orët e kaluara, koronavirusi i ri kishte vrarë 113 njerëz, duke rritur numrin e viktimave në 724.
Numri i të infektuarve kishte arritur në 13,938.
Shifrat e reja u njoftuan nga Alireza Vahabzadeh, këshilltar i ministrit të Shëndetësisë në Iran.
Një mori zyrtarësh politikë, doktorë, komandantë të Gardës elitare Revolucionare dhe klerikë janë infektuar nga virusi.
Disa prej tyre, përfshirë një këshilltar të ministrit të Jashtëm, Mohammad Javad Zarif, kanë vdekur, sipas mediave shtetërore.
Zëdhënësi i Ministrisë së Shëndetësisë, Kianush Jahanpur tha për televizionin shtetëror se 4,590 nga të infektuarit ishin shëruar, raporton Reutes.
Çekia paralajmëron karantinë të përgjithshme
Kryeministri çek, Adrej Babis, tha se qeveria ka të ngjarë të deklarojë një karantinë për të gjithë vendin, si përpjekje për të luftuar shpërthimin e koronavirusit.
Kabineti do të takohet të dielën pasdite.
"Jam i bindur se sot qeveria do ta marr këtë masë", tha ai në një intervistë në televizionin Prima, raporton Reuters.
Raste të reja me koronavirus në Kroaci
Në Kroaci janë konfirmuar shtatë raste të reja me koronavirusin e ri.
"Shtatë të infektuarit nuk duket se kanë ndonjë simptomë të rëndë", tha Shtabi Kombëtar i Krizave në Zagreb, përmes një konference për media.
Numri i përgjithshëm i të infektuarve në Kroaci ka arritur në 46.