KSHZ propozon shtyrjen e zgjedhjeve në Maqedoninë e Veriut
Komisioni Shtetëror i Zgjedhjeve i Maqedonisë së Veriut i ka propozuar krerëve shtetërorë dhe drejtuesve të partive politike që të shtyjnë zgjedhjet e parakohshme parlamentare të planifikuara për 12 prill, për shkak të situatës që është krijuar nga paraqitja e koronavirusit të ri.
Deri më tani, në këtë vend, 18 persona janë konfirmuar si të infektuar me koronavirus.
Anëtarët e KSHZ-së, theksuan se vetëm në komisionet zgjedhore janë më shumë se 35,000 njerëz që u duhet të komunikojnë personalisht me njëri tjetrin.
Austria me masa shtesë kundër koronavirusit
Kancelari i Austrisë njoftoi të dielën vendimin për kufizime të mëdha të lëvizjes në vendet publike, duke u kërkuar austriakëve që të izolohen.
Kancelari, Sebastian Kurz, tha se ndalimi vlen për tubimin e më shumë se pesë personave.
Njerëzit duhet të largohen nga shtëpia vetëm për punë urgjente, të blejnë furnizime të nevojshme ushqimore dhe të ndihmojnë të tjerët, tha ai.
Vendi ka konfirmuar 800 raste dhe një vdekje nga koronavirusi i ri.
Greqia ndalon qarkullimin me vendet fqinje
Greqia tha se do të ndalojë rrugët tokësore dhe detare, si dhe fluturimet me Shqipërinë, Maqedoninë e Veriut, dhe Spanjën për të frenuar përhapjen e koronavirusit.
Athina zgjati edhe kufizimet e udhëtimit për në Itali.
Në Shqipëri edhe katër raste të reja me koronavirus
Në Shqipëri është rritur numri i rasteve i të infektuarve me koronavirus.
Zëvëndësministrja e Shëndetësisë, Mira Rakacolli, bëri të ditur se gjatë 24 orëve të fundit janë konfirmua edhe katër raste të reja me koronavirus.
“Numri i përgjithshëm i të infektuarve në Shqipëri ka arritu në 42”, tha Rakacolli.
Pjesa më e madhe e rasteve është në Tiranë.