Të 50 shtetet e SHBA-së preken nga koronavirusi
Koronavirusi ka prekur të 50 shtetet e SHBA-së, pasi Virxhinia Perëndimore ka raportuar tashmë rastin e saj të parë.
Duke njoftuar për pacientin e parë me COVID-19, guvernatori i këtij shteti, Jim Justice, tha: “E dinim se kjo do të vinte”.
Mbi 6,300 njerëz janë të infektuar me koronavirus në SHBA, ndërsa 108 pacientë kanë humbur jetën.
Në gjithë botën, gati 200,000 vetë janë infektuar dhe afro 8,000 të tjerë kanë vdekur.
Zyrtarë të Nju Jorkut thanë se janë duke konsideruar izolimin total, si masë për frenimin e koronavirusit.
Kryetari Bill de Blasio tha se do të vendosë brenda dy ditësh nëse do t’i urdhërojë 8.5 milionë banorët e qytetit të vetizolohen.
Një vendim i tillë mund t’i kufizojë në masë të madhe njerëzit, duke i lejuar ata të dalin nga shtëpitë vetëm për të blerë ushqime ose ilaçe dhe në disa raste të tjera.
Presidenti Donald Trump tha në një konferencë për media të martën se kufizimet në udhëtime brenda SHBA-së janë po ashtu opsion.
Abazi: Nuk pajtohemi me shpalljen e gjendjes së jashtëzakonshme
Qeveria e Kosovës e konsideron propozimin e presidentit të Kosovës, Hashim Thaçi për shpalljen e gjendjes së jashtëzakonshme, si masë ekstreme. Andaj, kryeministri Albin Kurti dhe Qeveria e Kosovës nuk është pajtuar me presidentin për shpalljen e gjendjes së jashtëzakonshme.
Qëndrimin e kryeministrit dhe qeverisë e ka prezantuar në një konferencë për media, zëvendëskryeministri Haki Abazi. Ai tha se Qeveria do të shqyrtojë situatën nëse në një periudhë të caktuar mund të krijohen rrethanat për shpalljen edhe të gjendjes së jashtëzakonshme.
“Kryeministri ka shprehur qëndrimn e tij se nuk është në pajtueshmëri me masën ekstreme të shpalljes së gjendjes së jashtëzakonshme të cilën e ka propozuar presidenti sonte. Ne mendojmë që për një gjendje të tillë duhet të përcillet situata, sigurisht edhe të veprohet në momentin e duhur kur e kërkon nevoja dhe kur vendi gjendet ne një situatë që kërkon një veprim të tillë”, tha zëvendëskryeministri i Qeverisë së Kosovës, Haki Abazi.
Presidenti i Kosovës, Hashim Thaçi, në një konferencë për media, pas mbledhjes së Këshillit të Sigurisë, tha se do të propozojë në Kuvendin e Kosovës dekretin e shpalljes së gjendjes së jashtëzakonshme, pas situatës së krijuar me shpërthimin e koronavirusit të ri.
Thaçi i kërkon Kuvendit shpalljen e gjendjes së jashtëzakonshme
Presidenti i Kosovës, Hashim Thaçi tha se do të propozojë në Kuvendin e Kosovës dekretin e shpalljes së gjendjes së jashtëzakonshme, pas situatës së krijuar me shpërthimin e koronavirusit të ri.
Vendimi është marrë pas mbledhjes së Këshillit të Sigurisë, i cili mbajti një takim në orët e mbrëmjes më 17 mars.
“Duke u bazuar në Kushtetutën e Kosovës, do t’i propozoj Kuvendit të Republikës së Kosovës dekretin për gjendjen e jashtëzakonshme në Kosovë. Gjendja e jashtëzakonshme përfshin mobilizimin maksimal të FSK-së në gjithë Kosovën. Ky dekret po ndodh për shkak të fatkeqësisë së përhapjes së koronavirusit”, tha presidenti.
Thaçi para mediave tha se “Kosova nuk është vend i izoluar, por është e përfshirë nga koronavirusi i cili po praqet shqetësim për gjithë botën dhe po ashtu po paraqet shqetësime dhe për Kosovën pas rasteve të fundit".
Presidenti tha se këtë situatë mund ta tejkalojmë duke u angazhuar të gjithë.
Kuvendi i Kosovës pritet të mblidhet të mërkurën për të votuar dekretin e presidentit.
Çfarë thotë Kushtetuta për gjendjen e jashtëzakonshme?
Kushtetuta e Kosovës, përcakton se “nëse ka rrezik ndaj rendit kushtetues dhe sigurisë publike në Republikën e Kosovës, ose ekziston një fatkeqësi natyrore në tërë territorin e Republikës së Kosovës ose një pjesë të tij, Presidenti i Republikës së Kosovës, në konsultim me Kryeministrin, mund të shpallë gjendjen e jashtëzakonshme”.
Sipas Kushtetutës së Kosovës, neni 131 me shpalljen e gjendjes së jashtëzakonshme, Presidenti i vendit shpallë menjëherë një dekret, i cili përcakton natyrën e gjendjes së emergjencës dhe çfarëdo kufizimi mbi të drejtat dhe liritë.
“Brenda dyzet e tetë (48) orësh, Kuvendi mund të japë pëlqimin e tij me shumicën e votave të të gjithë deputetëve të pranishëm dhe që votojnë. Nëse nuk jepet pëlqimi, dekreti i Presidentit nuk ka forcë as efekt”, thuhet në Kushtetutë.
Akti më i lartë juridik i vendit thotë se gjatë gjendjes së jashtëzakonshme, presidenti mund të urdhërojë mobilizimin e Forcës së Sigurisë të Kosovës, për të ndihmuar në Gjendjen e Jashtëzakonshme.
Sa i përket kohëzgjatjes, Kushtetuta përcakton se gjendja e Jashtëzakonshme zgjat për aq kohë sa vazhdon të kërcënojë rreziku dhe nuk mund të zgjatë më shumë se për një periudhë prej gjashtëdhjetë (60) ditësh.
“Me pëlqimin e shumicës së deputetëve të Kuvendit të pranishëm dhe që votojnë, Gjendja e Jashtëzakonshme, nëse është e nevojshme, mund të zgjatet për periudha pasuese prej tridhjetë (30) ditësh, por jo më shumë se për nëntëdhjetë (90) ditë shtesë gjithsej”, thuhet në paragafin 5 të nenit 131 të Kushtetutës.
Por, paragrafi 6 i po të njejtit nen, thotë se “kur Presidenti konstaton se rreziku ndaj Republikës së Kosovës është i natyrës së jashtëzakonshme, Kuvendi mund të vendosë që Gjendja e Jashtëzakonshme të zgjasë më shumë se njëqind e pesëdhjetë (150) ditë, vetëm nëse për të votojnë dy të tretat (2/3) e të gjithë deputetëve të Kuvendit”.
Situata me koronavirusin
Në Kosovë deri më tani janë konfirmuar 19 raste me koronavirusin e ri.
Shumë shtete në botë kanë vendosur të shpallin gjendjen e jashtëzakonshme pas rritjes së numrit të të infektuarve me këtë virus.
Kjo bëhet në përpjekje për të parandaluar përhapjen e tij. Koronavirusi i ri ka shpërthyer në fund të vitit të kaluar në Kinë.
Në muajt vijues, pothuajse gjitha vendet e botës kanë raportuar raste me infeksione.
Sipas të dhënave të Universitetit John Hopkins deri më 17 mars, në gjithë botën janë konfirmuar 195,935 raste me koronaviusin e ri. Mbi 80,840 të infektuar janë shëruar, ndërkaq të vdekur si pasojë e sëmundjes Covid-19, janë mbi 7,866 persona.
Një pacient në Shqipëri drejt shërimit nga koronavirusi
Kryeministri i Shqipërisë, Edi Rama ka konfirmuar se për 48 orë mund të konfirmohet pacienti i parë i shëruar nga koronavirusi në Shqipëri.
“Kontakti i parë i pacientit zero që kurohet në spitalin infektiv doli negativ në testin e parë. Nëse edhe në testin e dytë pas 48 orësh ky rezultat do të konfirmohet, atëherë do të kemi të shëruarin e parë”, ka shkruar Rama.