Lutfi Haziri nuk është i prekur nga koronavirusi
Kryetari i Komunës së Gjilanit, Lutfi Haziri nuk është i prekur nga koronavirusi. Lajmin e ka konfirmuar vetë Haziri përmes rrjetit social, Facebook.
“Pasi iu nënshtrova në mëngjes testit për #Covid19 në Laboratorin e Mikrobiologjisë Molekulare të Institutit Kombëtar të Shëndetësisë Publike të Kosovës, para pak minutash mora rezultatin zyrtar, i cili, fatmirësisht, është negativ”, ka shkruar Haziri.
Në orët e paradites të së mërkurës, Haziri, njoftoi se ishte vetizoluar, pasi ditë më parë ka qenë në një ambient ku ndodhej edhe një person, që më pas ka rezultuar pozitiv në testet për koronavirus.
“Meqë javën e kaluar kam qenë në ambient të njëjtë, por pa kontakt me Muhamet Sejdiun, i cili rezultoi pozitiv, unë, nga mbrëmja, jam vetizoluar, duke iu nënshtruar testeve të protokollit shëndetësor”, kishte shkruar Haziri.
Në Kosovë, deri më tani janë konfirmuar 20 raste me koronavirus.
Radhët e gjata për miell...
Buka dhe produktet tjera të miellit janë të domosdoshme pothuajse për secilin prej nesh. Në kohën e përhapjes së koronavirusit të ri, një pjesë e popullsisë në Kosovë duket se ka dëshirë të ketë më shumë rezerva të këtij produkti në shtëpi. Shikojeni videon për më shumë hollësi.
Ministria e Shëndetësisë raporton "abuzuesit" e çmimeve të pajisjeve mjekësore
Zyrtarë të Ministrisë së Shëndetësisë kanë bërë të ditur se kanë furnizuar me pajisje mbrojtëse spitalet, klinikat dhe institucione tjera, përfshirë komunat, Policinë e Kosovës dhe zyrtarë doganorë, në kohën e përhapjes së koronavirusit të ri.
Naim Bardiqi, Sekretar i Përgjithshëm në këtë minisitri ka përmendur se pas tenderëve të shpallur për furnizim me këto pajisje është vërejtur rritje e çmimit të ofertave për 1,000 për qind.
Sipas tij, ministria ka njoftuar organet e hetuesisë për kompanitë që sipas tij kanë abuzuar me çmime.
“Të gjitha masat ndaj këtyre kompanive do të merren në bazë të ligjit për shëndetësi dhe kodit penal dhe do të sanksionohen që në situatë të emergjencës kombëtare kanë abuzuar me çmimet. Këto lloj keqpërdorime tejkalojnë kompetencat e inspektoratit shëndetësor apo farmaceutik”, ka thënë ai.
Bardiqi po ashtu ka njoftuar se pas pranimit të 400,000 mijë eurove nga Qeveria e Kosovës për sigurim të pajisjeve mbrojtëse, Ministria e Shëndetësisë ka nisur procedurën e blerjes së gjashtë llojeve të produkteve duke përfshirë: respiratorë të llojit FFP2, veshje mbrojtëse për tërë trupin, mburoja për fytyrë dhe pajisje tjera për një përdorim.
Ndërkohë është paralajmëruar që javën e ardhshme Kosova do të pranojë një kontigjent të furnizimeve në vlerë prej 7 milionë eurove nga Fondi i Kombeve të Bashkuara për Fëmijët (UNICEF).
Deri më tani në Kosovë është raportuar për 20 persona të prekur me koronavirusin e ri.
Shkon në 20 numri i të infektuarve me koronavirus në Kosovë
Instituti Kombëtar i Shëndetësisë Publike në Kosovë ka thënë se të mërkurën është konfirmuar edhe për një person të prekur me koronavirusin e ri.
“Rasti i konfirmuar është rast kontakti nga fshati Bradash-Podujevë, e gjinisë femër 55 vjeç”, është thënë në njoftimin e këtij Instituti.
Në njoftim është thënë edhe se deri më tani ky Institut ka kryer 308 teste të personave që dyshohet se janë prekur nga sëmundja COVID-19.
Me rastin e fundit, në Kosovë deri më tani është raportuar për 20 persona të infektuar me koronavirus.