Rritet numri i të vdekurve në Spanjë
Ministria e Shëndetësisë e Spanjës raportoi të enjten për 209 të vdekur nga koronavirusi, të cilët çojnë në 767 numrin e viktimave në këtë vend.
Ministria raportoi edhe për rritje të numrit të të infektuarve nga 13,716 në 17,147.
Spanja është vendi i katërt me numrin më të madh të viktimave nga koronavirusi, pas Kinës, Italisë dhe Iranit.
Ministria e Shëndetësisë po ashtu tha se 939 njerëz në këtë vend janë nën kujdes intensiv dhe se 1,107 të diagnostikuar me koronavirus, tashmë janë shëruar.
Ora policore në Beograd
Të mërkurën, në orën 20:00, ka hyrë në fuqi ora policore në Beograd, për të parandaluar përhapjen e koronavirusit. Masa do të zbatohet çdo mbrëmje nga ora 20:00 deri në 5:00.
Kryenegociatori i BE-së për Brexit-in ka koronavirus
Michel Barnier, kryenegociatori i Bashkimit Evropian për Brexit-in, ka dalë pozitiv në testin për koronavirus.
Në një postim në Twitter, ku bëri të ditur diagnozën, Barnier tha se ndjehet mirë.
Barnier është dashur të zhvillojë bisedime këtë javë në Londër, rreth daljes së Britanisë nga BE-ja (Brexit), por ato janë anuluar për shkak të pandemisë së koronavirusit.
Në Klinikën Infektive në Prishtinë po trajtohen 13 pacientë me koronavirus
Nga 20 personat e prekur me koronavirus në Kosovë, në Klinikën Infektive të Qendrës Klinike Universitare aktualisht janë të shtrirë trembëdhjetë persona.
Infektologu Valbon Krasniqi tha për Radion Evropa e Lirë se të gjithë pacientët janë në gjendje stabile, porse mbeten nën mbikëqyrje mjekësore.
Ai tha se qytetarët që dyshojnë se janë të prekur me koronavirus, në vazhdimësi po i frekuentojnë institucionet shëndetësore për t’i kryer testet laboratorike.
"Sa i përket testimit, nuk mund të jap ndonjë numër të saktë se sa njerëz gjatë ditës po testohen, meqë frekuenca e tyre është e madhe. Por, të gjitha testet kryhen në Institutin Kombëtar të Shëndetit Publik gjatë ditës, përpos atyre që vijnë pasdite, e që analizat u dalin të nesërmen në mëngjes”, tha Krasniqi.
Rastet e para me koronavirus në Kosovë janë konfirmuar më 13 mars.
Prishtina në periudhën e koronavirusit