Gjendja e të infektuarve në Kosovë është stabile
Ministri i Shëndetësisë në Kosovë, Arben Vitia, ka thënë se gjendja e të prekurve nga koronavirusi është stabile.
“Nga 13 persona që janë të shtruar, gjendja e tyre është stabile, me përjashtim të njërit prej pacientëve – më të moshuarit – që po asistohet me oksigjen terapi kohë pas kohe, por nuk është në gjendje të rëndë. Pacientët tjerë janë duke marrë një trajtim mjekësor mbështetës dhe janë në gjendje stabile”, ka thënë Vitia.
Ministri Vitia tha se në stoqe Kosova ka 1 mijë teste dhe janë porositur me urgjencë edhe 7 mijë të tjera të cilat pritet të arrijnë në fillim të javës që vjen.
Ai konfirmoi se numri i të infektuarve në Kosovë mbetet 20, dhe se disa teste që janë kryer gjatë orëve të mbëmjes së datës 18 mars kanë rezultuar negative.
Rastet e para me koronavirus në Kosovë janë konfirmuar më 13 mars.
Qeveria e Kosovës ka ndërmarrë disa masa për luftimin e sëmundjes, përfshirë shpalljen e gjendjes emergjente për shëndetin publik.
Evropa po shqyton zgjatjen e izolimit
Vendet evropiane po shqyrtojnë mundësinë e shtyrjes së izolimit për të parandaluar përhapjen e koronavirusit të ri.
Izolimi mbarëkombëtar në Itali i vendos më 12 mars dhe tani do të zgjasë përtej datës 25 mars, sa ishte planifikuar fillimisht.
Franca tha se bllokimi i saj 15-ditor mund të zgjatet gjithashtu.
Në të gjithë botën janë raportuar 207,000 raste me koronavirus, me më shumë se 8.600 vdekje.
BE-ja ka filluar me zbatimin e kontrolleve të rrepta kufitare.
Udhëtarët nga jashtë janë duke u larguar nga aeroportet dhe kufijtë, pasi blloku 27-vendësh, vendosi një ndalim të hyrjeve prej 30 ditësh për të ndaluar përhapjen e koronavirusit.
Para dhe pas shpërthimit të koronavirusit
Ju sjellim disa pamje nga vende të ndryshme të botës para dhe pas shpërthimit të koronavirusit. Koronavirusi i ri, që fillimisht u shfaq në Kinë në dhjetor të vitit të kaluar, deri më tani ka infektuar mbi 200 mijë persona në mbarë botën.