Nënpresidenti amerikan dhe gruaja e tij dalin negativë në testet për koronavirus
Nënpresidenti i Shteteve të Bashkuara, Mike Pence, dhe gruaja e tij, Karen, kanë dalë negativë në testet për koronavirus.
Sekretarja për media e Pence, Katie Miller, e bëri njoftimin në një postim në Twitter.
Pence ka thënë më herët se ai dhe gruaja e tij do të testohen për koronavirus, pasi një anëtar i stafit të tij ka dalë pozitiv.
“Marrë parasysh pozitën unike që kam si nënpresident dhe si udhëheqës i task-forcës së Shtëpisë së Bardhë për koronavirusin, unë dhe gruaja ime do të testohemi”, ka thënë ai.
Pence po ashtu ka thënë se pjesëtari i stafit të tij që ka dalë pozitiv, është në gjendje të mirë.
Anulohet Kampionati Botëror i Hokejit në Akull
Kampionati Botëror i Hokejit në Akull, i cili është dashur të niste në muajin maj në Zvicër, është anuluar, për shkak të pandemisë së koronavirusit.
“Ky është një realitet i hidhur me të cilin përballet familja e hokejit në akull, por ne duhet ta pranojmë atë”, tha presidenti i Federatës Ndërkombëtare të Hokejit në Akull, Rene Fasel.
“Koronavirusi është problem global dhe kërkon përpjekje të mëdha nga organet qeveritare për të luftuar përhapjen e tij”, shtoi ai.
Kampionati është dashur të zhvillohet nga data 8 deri më 24 maj në Cyrih dhe Llozanë të Zvicrës.
Pasi koronavirusi është përhapur gjithandej në glob, Federata Ndërkombëtare e Hokejit në Akull tha se është e pamundur që kampionati të zhvendoset në ndonjë vend tjetër.
Miliona amerikanë urdhërohen të qëndrojnë në shtëpi
Në disa shtete të SHBA-së është urdhëruar izolimi, si masë për frenimin e përhapjes së koronavirusit.
Konektikat dhe Nju Xhërsi u janë bashkuar Illinoisit dhe Kalifornisë, duke i urdhëruar qytetarët të qëndrojnë në shtëpi.
Shteti i Nju Jorkut i ka urdhëruar bizneset jothelbësore të mbyllen.
Afro 230 njerëz kanë humbur jetën si pasojë e koronavirusit në SHBA, ndërsa mbi 18,500 janë konfirmuar si të infektuar.
Në gjithë botën, mbi 307,000 pacientë kanë dalë pozitivë, ndërsa mbi 13,000 kanë vdekur.
Ndalesa e udhëtimeve jo të domosdoshme në kufirin SHBA-Kanada ka hyrë në fuqi mesnatën e së shtunës.
Duke folur në Shtëpinë e Bardhë, presidenti i Shteteve të Bashkuara, Donald Trump, tha se guvernatorët, kryebashkiakët dhe qytetarët janë duke vepruar me “urgjencë dhe shpejtësi” në “luftën kundër virusit”.
Shkon në 31 numri i të infektuarve me koronavirus
Instituti Kombëtar i Shëndetësisë Publike të Kosovës ka njoftuar se ka shkuar në 31 numri i personave të prekur me koronavirus në Kosovë.
Rasti i fundit që ka rezultuar pozitiv është thënë të jetë një 31-vjeçar nga fshati Senik i Malishevës.
Sipas të dhënave të Universitetit Johns Hopkins në gjithë botën, në total janë: 298,393 njerëz të infektuar,12,755 të vdekur dhe 91,540 të shëruar.