Kompania Facebook dhuron maska mbrojtëse
Shefi kompanisë Facebook, Mark Zuckerberg, tha të dielën se kompania e mediave sociale ka dhuruar rezervën e saj urgjente prej 720,000 maska për t'u siguruar punonjësve shëndetësorë më shumë pajisje mbrojtëse.
Shtetet e Bashkuara po ballafaqohen me rritje të kërkesës për maska të frymëmarrjes për shkak të përhapjes së koronavirusit të ri. Departamenti i Shëndetit dhe Shërbimeve Njerëzore në SHBA synon që gjatë 18 muajve të ardhshëm të blejë 500 milionë maska.
Merkel në karantinë
Kancelarja gjermane, Angela Merkel, është vendosur në karantinë pasi u informua se një mjek që e kishte ekzaminuar, është testuar si pozitiv për koronavirusin e ri.
Zëdhënësi i saj, Steffen Seibert, tha në një deklaratë se Merkel do t’i nënshtrohej "testeve të rregullta" në ditët në vijim dhe për momentin do të vazhdojë me punën e saj nga shtëpia.
Ai shtoi se kancelarja gjermane, e cila është 65 vjeç, u informua për rastin e mjekut, menjëherë pasi mbajti një konferencë shtypi të dielën, ku njoftoi për masa të reja të shtetit gjerman si përpjekje për parandalimin e përhapjes së koronavirusit.
Për shumicën e njerëzve, koronavirusi i ri shkakton vetëm simptoma të buta ose të moderuara, siç janë ethet ose kollitja. Për disa, veçanërisht të moshuarit dhe njerëzit me probleme shëndetësore ekzistuese, mund të shkaktojë sëmundje më serioze, përfshirë pneumoninë.
Rreth 93.800 njerëz janë shëruar, kryesisht në Kinë.
Në Kosovë janë konfirmuar edhe dy raste me koronavirus
Instituti i Shendetësisë Publike ka njoftuar edhe për dy raste të reja me koronavirus në Kosovë.
“Dy prej rasteve pozitive janë raste kontakti njëri me vendbanim nga fshati Vrapçiç komuna e Gjilanit, e gjinisë femër me moshë 50 vjeç dhe tjetri me vendbanim nga fshati Domanek komuna e Malishevës i gjinisë mashkull i moshës 53vjeç”, ka njoftua Instituti i Shëndetësisë Publike.
Numri i përgjithshëm i të infektuarve, tani është ngritur në 33 persona.
Në Serbi 222 raste me koronavirus
Deri në ora 18, më 22 mars, në Serbi janë konfirmuar 222 raste me koronavirus, tha ministria e Shëndetësisë.
Deri më tani, gjithsej 761 persona janë testuar për koronavirus.
Dy njerëz kanë vdekur nga kjo sëmundje.