Punëtorët në Lombardi paralajmërojnë greva
Sindikatat në rajonin e Lombardisë kanë njoftuar për organizim të grevave të hënën, me qëllim të mbrojtjes së shëndetit të punëtorëve të tyre, pasi kanë thënë se dekreti qeveritar për mbyllje të bizneseve për shkak të koronavirusit ka lënë shumë hapësirë për interpretim.
Italia është përballur me shpërthimin më vdekjeprurës të pandemisë që përcillet me probleme në frymëmarrje.
Deri më tani në këtë shtet kanë vdekur të paktën 5,476 persona, shumica prej tyre në Lombardi, rajonin e pasur italian, në të cilën gjendet edhe kryeqyteti financiar, Milano.
Një dekret qeveritar, i nënshkruar të dielën, ka përcaktuar që të gjitha bizneset përveç atyre që janë të “domosdoshme” të mbyllen deri më 3 prill.
Në të është përfshirë një listë e gjatë e bizneseve, që janë përjashtuar nga kjo masë, pasi janë konsideruar jetike për të mbajtur gjallë zixhirin e furnizimit në Itali.
Gjatë ditës, disa kompani që përpunojnë metalin, më pas punëtorë të kompanive që merren me lëndë kimike, janë ankuar për sigurinë e tyre, pasi këta sektorë nuk lidhen me atë të shëndetësisë, andaj veprimtaria e tyre nuk është tejet e domosdoshme këto ditë.
Punëtorët e disa bankave po ashtu kanë kërcënuar me grevë, duke thënë se po detyrohen që të punojnë në kushte të pasigurta, pa maska, doreza dhe lëngje dezinfektuese.
Lajmin e plotë e gjeni këtu.
Shkon në 35 numri i të prekurve nga koronavirusi në Kosovë
Instituti Kombëtar i Shëndetësisë Publike të Kosovës ka njoftuar të hënën se janë konfirmuar edhe dy raste tjera të prekura me koronavirusin e ri.
“Dy prej rasteve pozitive janë raste kontakti njëri me vendbanim nga fshati Petrovë komuna e Shtimes, e gjinisë mashkull me moshë 44 vjeç dhe tjetra me vendbanim në Prishtinë nga komuna e Prishtinës e gjinisë femër e moshës 39 vjeç”, është thënë në njoftim.
Duke përfshirë dy rastet e fundit, numri i personave të infektuar në Kosovë me këtë sëmundje ka arritur në 35.
Autoritetet kanë njoftuar të dielën edhe për një person të vdekur nga Covid-19.
Qeveria e Kosovës ka shpallur gjendje të emergjencës për shëndetin publik me qëllim të parandalimit të përhapjes së kësaj sëmundjeje.
KEDS: Mospagesa e faturave rrezikon furnizimin me energji elektrike
Distribucioni për Furnizim me Energji Elektrike (KEDS) dhe Operatori për furnizim me energji elektrike në Kosovë (KESCO) kanë thënë përmes një komunikate se situata e fundit e krijuar pas përhapjes së koronavirusit është duke e rrezikuar edhe funksionalitetin e këtyre trupave, pasi kanë rënë në minimum pagesat e energjisë elektrike, duke e bërë të pamundur mbulimin e shpenzimeve.
“Energjia elektrike është jetike në këto kohë të vështira që po kalon vendi dhe në përballimin e kësaj situate involvimi i të gjithë akterëve është i domosdoshëm. Në presim zgjidhje dhe mbështetje edhe nga Qeveria e Kosovës, pasi situata e pagesave është rënduar së tepërmi pas tendencës për shtyerje të pagesave në bazë të deklarimeve publike të bëra po nga qeveria”, thuhet në njoftimin e KEDS.
Qeverisë së Kosovës deri më tash i është bërë kërkesë nga disa shoqata ekonomike që pagesat e ujit, energjisë, ngrohjes dhe mbeturinave të shtyhen deri më 30 prill.
Megjithatë ekzekutivi nuk e ka përfshirë një gjë të tillë, në kuadër të masave që ka marrë për luftimin e përhapjes së koronavirusit.
Deri më tani në Kosovë është raportuar për 33 persona të infektuar me koronavirus, si dhe për një të vdekur si pasojë e kësaj sëmundjeje.
Situata me koronavirus në Itali – vendin më të prekur në Evropë:
Italia në 10 ditë