Shtyhen finalet e Ligës së Kampionëve dhe Ligës së Evropës
Ndeshjet finale të Ligës së Kampionëve dhe Ligës së Evropës janë shtyrë për shkak të shpërthimit të koronavirusit, ka thënë trupi udhëheqës në këtë sport, Federata Evropiane e Futbollit (UEFA).
Finalet në këto liga ishte planifikuar të mbaheshin në muajin maj.
Ende nuk është e ditur ndonjë datë se kur do të zhvillohen këto ndeshje.
Përveç kësaj, është bërë e ditur se është pezulluar edhe sezona e brendshme spanjolle, derisa, siç ka thënë qeveria, të caktohet një datë që nuk përbën rrezik për shëndetin publik.
Spanja deri më tani ka regjistruar 2,182 vdekje nga koronavirusi, ka njoftuar qeveria e këtij shteti më herët.
Numri i rasteve të regjistruara deri më tani ka kaluar shifrën 33,089.
Bie numri i viktimave në Itali për të dytën ditë me radhë
Italia ka raportuar të hënën për 602 njerëz të vdekur nga koronavirusi.
Kjo shifër e çon në 6,078 numrin e viktimave në Itali, por, në të njëjtën kohë, tregon se numri i të vdekurve ka rënë për të dytën ditë me radhë.
Të dielën, autoritetet italiane kanë raportuar për 651 të vdekur.
Italia është vendi i goditur më së keqi në Evropë nga koronavirusi, me afro 70,000 njerëz të infektuar.
Javën e kaluar, ajo e ka kaluar Kinën – vendin e origjinës së koronavirusit – me numrin e viktimave.
Aktualisht, Kina ka 3,153 viktima.
Si duhet të vendoset maska për t’u mbrojtur nga koronavirusi? Sa shpesh duhet të ndërrohet dhe si duhet të hidhet në plehra? Organizata Botërore e Shëndetësisë u përgjigjet këtyre pyetjeve dhe të tjerave përmes infografikave.
Si dhe kur duhet të përdoret maska?
Shefi i OBSH-së: Pandemia ka marrë hov
Shefi i Organizatës Botërore të Shëndetësisë (OBSH), Tedros Adhanom Ghebreyesus, ka thënë të hënën se pandemia e koronavirusit “ka marrë hov”.
“Janë dashur 67 ditë nga rasti i parë për të arritur në 100,000 raste; 11 ditë për 100-mijëshin e dytë dhe vetëm katër ditë për 100-mijëshin e tretë”, ka thënë Ghebreyesus në një konferencë për media në Gjenevë.
Ai po ashtu ka thënë se do t’iu adresohet krerëve të G20-ës, apo grupit të vendeve më të industrializuara, këtë javë, për t’iu kërkuar që të punojnë së bashku në prodhimin e paisjeve mbrojtëse.
OBSH-ja e ka shpallur Evropën epiqendër të pandemisë.
Italia dhe Spanja bartin numrin më të madh të viktimave dhe të të infektuarve.
Pas tyre vijnë Gjermania, Franca, Zvicra e të tjera.
Shumica e vendeve të prekura në botë kanë ndërmarrë masa të ashpra – përfshirë izolimin dhe mbylljen e kufijve – në përpjekje për të frenuar përhapjen e sëmundjes.
