Si dhe kur duhet të përdoret maska?
Si duhet të vendoset maska për t’u mbrojtur nga koronavirusi? Sa shpesh duhet të ndërrohet dhe si duhet të hidhet në plehra? Organizata Botërore e Shëndetësisë u përgjigjet këtyre pyetjeve dhe të tjerave përmes infografikave:
Si dhe kur duhet të përdoret maska?
Gjysma e popullsisë amerikane urdhërohet të qëndrojë në shtëpi
Më shumë se gjysma e shteteve amerikane kanë vendosur kufizime të reja për njerëzit, në përpjekje për të frenuar përhapjen e mëtejshme të koronavirusit.
Shumica e tyre kanë lëshuar urdhra për qëndrim në shtëpi, për të shmangur rritjen e numrit të njerëzve që infektohen.
Shtetet e Bashkuara kanë tani numrin e tretë më të madh të rasteve në botë, pas Kinës dhe Italisë.
Sipas të dhënave të Universitetit Johns Hopkins në SHBA, mbi 46,000 njerëz janë të infektuar atje dhe 610 kanë humbur jetën.
Drejtori i përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, ka paralajmëruar të hënën se pandemia e koronavirusit "po merr hov", por ka thënë se është akoma e mundur që "të ndryshohet trajektorja".
Së paku 18 shtete të SHBA-së, në të cilat jetojnë 158 milionë njerëz, ose gati gjysma e popullsisë amerikane, kanë lëshuar urdhra për qëndrim në shtëpi.
Banorët mund të dalin vetëm për të blerë ushqime, ilaçe ose nevoja të tjera.
Uashingtoni, ku ka ndodhur më shumë se një e katërta e vdekjeve në SHBA nga koronavirusi, është bërë shteti më i fundit që ka lëshuar urdhër të tillë.
Nju Jorku, i cili ka mbi 20,000 njerëz të infektuar dhe 157 viktima, ka kërkuar urgjentisht pajisje mjekësore.
Gati 5,000 të infektuar brenda një dite në Gjermani
Numri i rasteve të konfirmuara me koronavirus në Gjermani është rritur për 4,764 brenda ditës, duke e çuar në 27,436 numrin total të të infektuarve.
Të dhënat u publikuan të martën nga Instituti për Sëmundje Infektive “Robert Koch”.
Sipas tyre, në Gjermani kanë vdekur 114 njerëz si pasojë e sëmundjes që e shkakton koronavirusi, COVID-19.
Megjithaë, autoritetet gjermane kanë thënë të hënën se ka shenja të ngadalësimit të ritmit të rasteve të reja me koronavirus.
Trump: Aziatiko-amerikanët “nuk duhet të fajësohen” për koronavirusin
Presidenti i Shteteve të Bashkuara, Donald Trump, i cili është kritikuar për etiketimin e koronavirusit si “virus kinez”, tha se aziatiko-amerikanët nuk duhet të fajësohen për shpërthimin e sëmundjes.
"Është shumë e rëndësishme që ne t'i mbrojmë plotësisht aziatiko-amerikanët”, tha Trump, duke i vlerësuar ata si "njerëz të mahnitshëm".
Ai i bëri komentet në kohën kur ka gjithnjë e më shumë raportime për sulme verbale dhe fizike ndaj komunitetit aziatik në SHBA, për shkak të pandemisë, shkruan BBC.
Koronavirusi vazhdon të përhapet në Shtetet e Bashkuara, ku aktualisht janë mbi 43,000 njerëz të infektuar dhe 533 të vdekur.
Në një konferencë për media, javën e kaluar, Trump ka përdorur termet “virus kinez” dhe “virus i Kinës”, duke i hedhur poshtë sugjerimet e gazetarëve se ato janë raciste.
“Vjen nga Kina. Nuk është fare raciste”, ka thënë Trump.
Kina, ku rastet me koronavirus janë shfaqur për herë të parë në fund të vitit të kaluar, i ka kritikuar deklaratat e Trumpit.
Organizata Botërore e Shëndetësisë, ndërkaq, ka lëshuar një udhëzim kundër “stigmatizimit të komuniteteve të caktuara” kur flitet për sëmundjen.
