Lirohen përkohësisht nga TVSH-ja importet e grurit dhe miellit
Ministria e Financave dhe Transfereve e Kosovës ka marrë vendim për lirimin e përkohshëm nga pagesa e Tatimit mbi Vlerën e Shtuar (TVSH) për të gjitha importet e grurit dhe miellit.
Njoftimi vjen në kohën kur Kosova - si edhe vendet e tjera të botës - po përballet me përhapjen e një koronavirusi që shakton sëmundjen COVID-19.
Aktualisht, në Kosovë janë 61 persona të infektuar, ndërsa një pacient ka humbur jetën.
Ministria e Financave dhe Transfereve tha se vendimi i saj për lirim nga TVSH-ja të importeve të grurit dhe miellit hyn në fuqi nga dita e sotme dhe se për zbatimin e tij obligohet Administrata Tatimore e Kosovës dhe Dogana e Kosovës.
Lojërat Olimpike Verore shtyhen për vitin 2021
Kryeministri i Japonisë, Shinzo Abe, tha se ai dhe presidenti i Komitetit Olimpik Ndërkombëtar, Thomas Bach, janë pajtuar për të shtyrë Lojërat Olimpike Verore Tokio 2020 për një vit, si pasojë e pandemisë së sëmundjes Covid-19.
“Kam propozuar shtyrjen e Olimpiadës për rreth një vit dhe presidenti Bach është pajtuar 100%”, u tha Abe gazetarëve.
Ky veprim, i paparë në kohë të paqes, është kërkuar “të merret në konsideratë në rrethanat e tanishme”, shtoi Abe.
Komiteti Olimpik Ndërkombëtar tha se Olimpiada 2020 do të mbahet “jo më vonë se vera e vitit 2021” dhe se Lojërat do të quhen Tokio 2020.
Olimpiada, e cila mbahet çdo katër vjet qysh në vitin 1948, është ngjarja e profilit më të lartë që anulohet, si pasojë e sëmundjes Covid-19.
Kjo sëmundje, e cila shkaktohet nga një koronavirus i ri, ka vrarë mbi 17,000 njerëz në botë.
Tokio, deri më tash, ka shpenzuar rreth 12.6 miliardë dollarë për organizimin e Lojërave Olimpike.
BE-ja Kosovës: Është koha për unitet politik
Bashkimi Evropian u bëri thirrje udhëheqësve të institucioneve të Kosovës që të punojnë së bashku për luftimin e pandemisë së sëmundjes COVID-19, të shkaktuar nga një koronavirus i ri.
“Në këtë kohë të vështirë dhe sfiduese, populli i Kosovës ka nevojë për udhëzime të qarta dhe siguri se do të ndërmerren të gjitha masat e mundshme për t’i zbutur efektet e pandemisë”, thuhet në deklaratën e BE-së.
Kosova ka aktualisht 61 raste të të infektuarve me koronavirus, ndërsa një person ka humbur jetën.
Të hënën, Qeveria e Kosovës ka marrë vendim për kufizim të lëvizjes së qytetarëve disa orë në ditë, si masë për frenimin e përhapjes së koronavirusit.
Por, presidenti i Kosovës, Hashim Thaçi, e ka kundërshtuar këtë vendim dhe e ka dërguar për interpretim në Gjykatën Kushtetuese.
“U bëjmë thirrje të gjithë udhëheqësve të institucioneve që të punojnë së bashku (në respektim të plotë të Kushtetutës së Kosovës) dhe ta drejtojnë tërë energjinë dhe mundin e tyre drejt luftimit të pandemisë dhe ofrimit të sigurisë për popullin e Kosovës. Nuk është koha për antagonizma politikë ose institucionalë, por për unitet politik”, porositi BE-ja.