Republika Çeke shënon viktimën e tretë me koronavirus
Ministri Çek i Shëndetësisë, Adam Vojtech ka thënë se Republika Çeke ka regjistruar personin e tretë të vdekur me koronavirus.
Ai ka thënë se viktima e tretë është një grua në të 70-at.
Ky lajm vjen një ditë pasi Ministria e Brendshme ka zgjatur masat kufizuese në lëvizjet e njerëzve deri më 1 prill.
Sipas rregullave të reja, dyqanet më të vogla se 500 metra katrorë, nuk do të jenë më të rezervuara për të moshuarit në asnjërën kohë të ditës.
Pronarët e dyqaneve, megjithatë, duhet t’iu japin atyre prioritet nëse ata hyjnë nëpër to.
Përveç kësaj, është vendosur që koha e ndarë për këtë kategori në dyqanet më të mëdha se 500 metra do të jetë nga ora 8:00 deri në 10:00 të mëngjesit.
Më 24 mars, Republika Çeke ka raportuar për 1,394 persona të prekur me koronavirus.
Nga 19 marsi, mbulimi i gojës dhe hundës me maskë apo shall është bërë i detyrueshëm në të gjitha hapësirat publike.
Irani refuzon ndihmën e një organizate bamirëse me bazë në Gjenevë
Irani, një nga shtetet e goditura më së keqi nga koronavirusi në botë, ka kundërshtuar ofertën e një organizate bamirëse, me bazë në Gjenevë, për të krijuar një spital të improvizuar me 50 shtretër, në qendër të qytetit Isfahan.
Numri total i personave të infektuar në këtë shtet është rritur për 1,762 në 24 orët e fundit, duke e dërguar numrin total në 24,811.
Ministria po ashtu ka njoftuar se numri i të vdekurve ka arritur në 1,934.
“Ne jemi befasuar kur kemi kuptuar se është pezulluar angazhimi yne për trajtim atje”, ka thënë, Michel-Olivier Lacharite, që gjendet në krye të ekipit në krizë në Organizatën, Medecins Sans Frontieres.
Lacharite ka thënë se organizata ka qenë e gatshme që të krijojë spitalin në fund të javës, pasi ka marrë lejen fillestare nga autoritetet.
Alireza Vahabzadeh, këshilltar i ministrit të Shëndetësisë, ka thënë se “nuk ka nevojë tani për vendosje të shtretërve nga forcat e huaja, dhe prezenca e tyre përjashtohet”.
Zyrtarët iranianë kanë refuzuar edhe ofertën e Shteteve të Bashkuara për ofrim të ndihmës, duke thënë se Uashingtoni duhet të largojë sanksionet nëse dëshiron t’i ndihmojë Teheranit në luftim të pandemisë.
Irani përballet tash e një kohë me sanksionet amerikane për shkak të programit bërthamor dhe atij të armëve.
Anijet-spitale në SHBA
Ushtria e Shteteve të Bashkuara ka vënë në dispozicion për autoritetet shëndetësore dy anije-spitale me nga 1,000 shtretër secila. Spitalet në SHBA mund të hasin në mungesë të shtretërve nëse numri i të prekurve me koronavirus vazhdon të rritet.
