Qytetarët e Tuzit pranojnë izolimin
Në ditën e parë prejse autoritetet në Mal të Zi kanë urdhëruar karantinë pa kushte për qytetarët e Komunës së Tuzit, rrugët e këtij qyteti janë zbrazur.
Të martën mbrëma, autoritetet komunale dhe shtetërore kanë urdhëruar izolim total, pas konfirmimit të 15 rasteve me koronavirus në Tuz.
“Nuk mund të dalim jashtë, pos në kopshtin tonë. Për të gjitha që na duhen, kemi numrin kontaktues të komunës. Ne u japim listën, ata na i sjellin furnizimet në shtëpi. Askush nuk shkon në punë”, tha një qytetare e Tuzit për Radion Evropa e Lirë, emri i së cilës është i njohur për redaksinë.
Në hyrje të Komunës së Tuzit ndodhen edhe patrullat e policisë.
“Duke u izoluar të gjithë mund ta parandalojmë përhapjen e koronavirusit, mund të mbrojmë të rinjtë dhe të moshuarit. E kemi edhe mbështetjen e shtetit”, ka thënë kryetari i Tuzit, Nik Gjeloshaj.
Mali i Zi ka konfirmuar 53 raste të të infektuarve me koronavirus, ndërsa një pacient e ka humbur jetën.
Edhe tetë raste të reja me koronavirus në Kosovë
Autoritetet në Kosovë njoftuan të mërkurën se tetë persona të testuar për koronavirus, kanë dalë pozitivë.
Instituti Kombëtar i Shëndetësisë Publike tha se në total janë testuar 34 vetë.
Në komunikatën e tij për media thuhet se katër nga të infektuarit e rinj janë me vendbanim në fshatin Domanek, Malishevë, tre në Prishtinë dhe një në fshatin Studime e Ulët, Vushtrri.
Shifra e fundit e çon në 71 numrin e të infektuarve në Kosovë.
Më 22 mars, Kosova ka regjistruar edhe viktimën e parë nga koronavirusi.
Presidenti i Brazilit e minimizon kërcënimin nga koronavirusi
Presidenti i Brazilit, Jair Bolsonaro, i akuzoi mediat për ngjallje të frikës nga koronavirusi.
Në një adresim televiziv, ai u bëri thirrje kryebashkiakëve dhe guvernatorëve të heqin dorë nga kufizimet që kanë prezantuar për të frenuar përhapjen e sëmundjes.
Bolsonaro i bëri komentet pasi dy qytete të mëdha të Brazilit, Sao Paulo dhe Rio de Zhaneiro, u vendosën në izolim të pjesshëm.
Brazili ka raportuar 2,200 raste të të infektuarve me koronavirus dhe 46 viktima.
“Jeta jonë duhet të vazhdojë. Puna duhet të mbahet. Ne duhet t’i kthehemi normalitetit”, tha Bolsonaro.
Në këtë infografikë mund të shihni kapacitetet që i ka Kosova:
Lufta e Kosovës kundër COVID-19