Kongresi miraton paketë masive të ndihmës për të luftuar koronavirusin
Kongresi i Shteteve të Bashkuara miratoi të premten një paketë financiare, në vlerë prej dy trilionë dollarësh, për të luftuar pandeminë e koronavirusit.
Dhoma e Përfaqësuesve e miratoi paketën dy ditë pas Senatit.
"Kombi ynë përballet me një emergjencë ekonomike dhe shëndetësore me përmasa historike, për shkak të pandemisë se koronavirusit - pandemisë më të keqe në mbi 100 vjet", tha kryetarja e Dhomës së Përfaqësuesve, Nancy Pelosi.
Presidenti amerikan, Donald Trump, tha se do ta nënshkruajë paketën e ndihmës.
Të mërkurën, numri i amerikanëve që janë lajmëruar si të papunë, është rritur në 3.3 milionë.
Shtetet e Bashkuara kanë regjistruar raste me koronavirus më shumë se çdo vend tjetër: mbi 94,200.
Mbi 1,430 pacientë kanë vdekur atje.
Edhe dy të infektuar me koronavirus në Kosovë
Në Kosovë janë regjistruar të premten edhe dy raste të të infektuarve me koronavirus, të cilat e çojnë në 88 numrin total të të infektuarve.
Instituti Kombëtar i Shëndetësisë Publike në Kosovë (IKSHPK) tha se nga 108 teste që janë kryer, dy kanë dalë pozitivë.
“Rastet pozitive janë raste kontakti, një me vendbanim në Gjakovë dhe tjetri në Prishtinë”, thuhet në njoftimin e IKSHPK-së.
Më 22 mars, Kosova ka regjistruar edhe viktimën e parë nga koronavirusi.
Autoritetet kanë shpallur gjendje emergjente për shëndetin publik.
Me muzikë kundër koronavirusit
Anëtarët e Orkestrës Filarmonike të Roterdamit kanë zgjedhur një mënyrë të veçantë për të interpretuar veprën e njohur të Bethovenit “Ode to Joy”.
Ndiqeni këtë interpretim të jashtëzakonshëm derisa secili artist që luan në instrumente, ndodhet i izoluar në shtëpi.
Trump i uron Johnsonit shërim të shpejtë
Presidenti i Shteteve të Bashkuara, Donald Trump, i telefonoi kryeministrit të Britanisë, Boris Johnson, pasi ky i fundit njoftoi të premten se është infektuar me koronavirus.
Shtëpia e Bardhë tha se Trump e ka falënderuar Johnsonin për "miqësinë e ngushtë" dhe se i ka uruar atij "shërim të shpejtë".
Qeveria britanike tha se dy liderët janë pajtuar që të punojnë së bashku për të mposhtur pandeminë e koronavirusit.
Johnson, përmes një videoje në Twitter, njoftoi se ka koronavirus, por tha se simptomat e tij janë të lehta dhe se do të vazhdojë të punojë prej shtëpisë.