Izolimi nga COVID-19 – bie numri i të arrestuarve
Vetizolimi si masë mbrojtëse nga koronavirusi ka ndikuar që në Kosovë të ketë më pak të arrestuar. Kështu të paktën tregojnë statistikat e Policisë së Kosovës.
Që nga data 13 mars, kur në Kosovë u paraqitën rastet e para me COVID-19, Policia e Kosovës ka arrestuar 246 persona.
Sipas Policisë së Kosovës, krahasuar me dy muajt paraprakë të këtij viti, këtë muaj vërehet rënie e numrit të të arrestuarve.
Artikullin e plotë mund ta lexoni këtu.
Edhe 139 të vdekur nga koronavirusi në Iran
Irani raportoi të shtunën për 139 viktima të reja nga koronavirusi, të cilat e çojnë në 2,517 numrin total të tyre.
Zëdhënësi i Ministrisë së Shëndetësië, Kianoush Jahanpour, i tha televizionit shtetëror iranian se numri i rasteve të të infektuarve është rritur gjatë 24 orëve të fundit për 3,076, përkatësisht në 35,408.
Irani është vendi i shtatë në botë me numrin më të madh të të infektuarve.
Para tij janë: SHBA-ja, Italia, Kina, Spanja, Gjermania dhe Franca.
Presidenti i Iranit, Hassan Rohani, është zotuar se autoritetet do ta frenojnë përhapjen e koronavirusit brenda dy javësh.
Koronavirusi nuk ua ndryshon shumë jetën suedezëve
Derisa miliarda banorë të botës janë urdhëruar të izolohen, për të frenuar përhapjen e koronavirusit, në Suedi shumica e dyqaneve, shkollave, bareve dhe restoranteve mbeten të hapura.
Koronavirusi nuk ua ndryshon shumë jetën suedezëve
Pacientët në Kosovë janë në gjendje stabile
Shumica e pacientëve me koronavirus, të shtrirë në Klinikën Infektive në Qendrën Klinike Universitare të Kosovës, janë në gjendje stabile shëndetësore, ndërkohë që vetëm tetë prej tyre janë duke u trajtuar me oksigjenoterapi, bëri të ditur për Radion Evropa e Lirë infektologu në Klinikën Infektive, Valbon Krasniqi.
“Gjendja në përgjithësi e pacientëve është stabile. Tetë prej tyre janë me oksigjenoterapi”, tha Krasniqi.
Klinika Infektive në Qendrën Klinike Universitare të Kosovës, një ditë më parë, ka regjistruar personin e parë nga stafi shëndetësor të infektuar me koronavirus.
Krasniqi tha se i gjithë stafi që ka pasur kontakt me infermieren e infektuar, është testuar dhe ka dalë negativ.
Aktualisht në Kosovë, 88 persona janë të infektuar me Covid-19, sëmundjen që e shkakton koronavirusi, ndërsa një pacient ka vdekur.