Borrell, Pompeo bisedojnë për forcimin e bashkëpunimit ndërkombëtar kundër koronavirusit
Shefi i politikës së jashtme të Bashkimit Evropian, Josep Borrell, dhe sekretari amerikan i Shtetit, Mike Pompeo, biseduan përmes telefonit për nevojën e forcimit të bashkëpunimit ndërkombëtar në luftën kundër pandemisë së koronavirusit.
Në një komunikatë të publikuar të shtunën nga BE-ja thuhet se Borrell dhe Pompeo janë pajtuar që ndihma mjekësore për vendet më të rrezikuara duhet të rritet me shpejtësi.
“BE-ja dhe SHBA-ja kanë kapacitet për të kontribuar në mënyrë të konsiderueshme në përpjekjet ndërkombëtare për të trajtuar pandeminë", thuhet në deklaratën e BE-së.
Gjatë bisedës me Pompeon, Borrell po ashtu theksoi nevojën e ofrimit të informacioneve të sakta dhe transparente për qytetarët, në kohën kur janë duke u rritur shqetësimet dhe duke qarkulluar lajme të rreme për koronavirusin.
Pompeo, në llogarinë e tij në Twitter, tha se ka biseduar me Borrellin dhe se marrëdhëniet transatlantike “kanë rëndësi të madhe për shëndetin publik global dhe për avancimin e interesave të përbashkëta në Libi, Siri, Venezuelë dhe në Ballkanin Perëndimor".
Të premten është bërë e ditur se Departamenti amerikan i Shtetit ka ndarë afro 274 milionë dollarë fonde humanitare për të ndihmuar vendet e rrezikuara në luftën kundër koronavirusit.
Kosovës i janë ndarë 1.1 milion euro.
Pezullimi nga puna në kohë pandemie
V.K. (emër i njohur për redaksinë e Radios Evropa e Lirë) është pezulluar nga puna nga punëdhënësi i tij në Kosovë, menjëherë pas marrjes së masave nga Qeveria e Kosovës për mbylljen e bareve, restoranteve dhe qendrave tregtare, për parandalimin e përhapjes së koronavirusit.
“Kam punuar në një restorant dhe në ditën që qeveria ka marrë vendim t’i mbyllë restorantet për shkak të virusit, neve na kanë lëshuar në shtëpi dhe na kanë thënë që nuk keni nevojë të vini në punë derisa t’ju thërrasim. Na kanë paguar për ato ditë të muajit sa kemi punuar dhe më nuk na kanë thirrur. Unë jam mbajtës i familjes”, thotë ai.
Artikullin e plotë mund ta lexoni këtu.
Shkon në dhjetë numri i viktimave në Shqipëri
Në Shqipëri, në 24 orët e fundit kanë vdekur dy persona, duke e çuar në 10 numrin e viktimave nga koronavirusi.
Po ashtu, gjatë kësaj kohe janë testuar 79 persona për koronavirus, prej të cilëve 11 kanë dalë pozitivë.
Silva Bino, nga Instituti i Shëndetit Publik, njoftoi për të dhënat.
“Gjatë 24 orëve të fundit kanë ndërruar jetë dy pacientë në Spitalin Infektiv, një 67-vjeçar nga Tirana dhe një 72-vjeçare nga Vlora”, tha Bino.
Në Shqipëri, në total, janë 197 persona të konfirmuar me koronavirus.
Mbi 5,000 viktima nga koronavirusi në Spanjë
Numri i viktimave nga koronavirusi në Spanjë ka kaluar 5,000, pasi autoritetet kanë raportuar për 832 vdekje në 24 orët e fundit.
Numri total i viktimave në këtë vend tani është 5,690, ndërsa i të infektuarve 72,248.
Në aspektin e viktimave, Spanja është aktualisht vendi i dytë i goditur më së keqi, pas Italisë.
Gjendja e jashtëzakonshme atje do të jetë në fuqi së paku deri më 12 prill.
Shumica e dyqaneve dhe e bizneseve janë mbyllur, ndërsa lëvizjet e njerëzve janë kufizuar në masë të madhe.
Ushtria spanjolle është angazhuar të pastrojë spitalet dhe objektet e tjera.