Mitrovica e Veriut: Dy persona të prekur me koronavirus
Dy persona në Mitrovicën e Veriut kanë dalë pozitivë në testet për koronavirus, ka konfirmuar Instituti “Torlak” në Beograd, ndërsa rezultatet janë dorëzuar për shëndet publik në Mitrovicën e Veriut.
Epidemiologu, Aleksandar Antonieviq ka konfirmuar për Shërbimin e Ballkanit të Radios Evropa e Lirë, se bëhet fjalë për një qytetar nga Mitrovica e Veriut dhe një nga Leposaviqi, të cilët janë duke u trajtuar në Klinikën Infektive.
Sipas tij, dy pacientët kanë simptoma të lehta të sëmundjes.
Mësohet se në Mitrovicën e Veriut në total janë testuar 18 persona dhe se për tre prej tyre priten rezultatet.
Instituti i Virologjisë, Vaksinave dhe Serumeve, “Torlak” analizon mostra nga komunitetet serbe në Kosovë dhe funksionon në kuadër të sistemit shëndetësor të Serbisë.
Numri i të infektuarve me koronavirus në mjediset serbe në Kosovë është tre.
Më herët është konfirmuar infektimi i një gruaje nga rrethina e Lipjanit.
Të shtunën mbrëma, Instituti Kombëtar i Shëndetësisë Publike ka konfirmuar se numri i të infektuarve me Covid-19 në Kosovë është 91.
Duke llogaritur edhe mjediset serbe, ky numër shkon në 94.
Policia arreston 40 persona për mosrespektim të masave për qarkullim
Policia e Kosovës ka arrestuar 40 persona nga qytete të ndryshme, të cilët nuk kanë respektuar masat e vendosura nga Qeveria e Kosovës, për parandalimin e përhapjes së koronavirusit, thuhet në raportin 24-orësh të policisë.
Qeveria në detyrë e Kosovës ka vendosur që të ndalojë qarkullimin e qytetarëve dhe automjeteve private prej orës 17:00 deri në 6:00.
Në Kosovë deri më tani 91 persona janë të prekur me koronavirusin e ri.
Më 22 mars, Kosova ka regjistruar edhe viktimën e parë nga koronavirusi.
Autoritetet kanë shpallur gjendje emergjente për shëndetin publik.
Shikoni kapacitetet e Kosovës në luftën kundër koronavirusit, në kohën kur shumë shtete në botë po përgatiten për t'u përballur me pikun e kësaj sëmundjeje në pak ditë.
Lufta e Kosovës kundër COVID-19
Vdes foshnja e parë nga koronavirusi në SHBA
Shtetet e Bashkuara kanë regjistruar vdekjen e parë të një foshnjeje të prekur nga koronavirusi i ri.
Foshnja ka vdekur në Çikago, ka thënë Drejtori i Departamentit për Shëndetin Publik, Ngozi Ezike.
“Kurrë më parë nuk është raportuar për vdekje të lidhura me koronavirus te foshnjet. Kemi nisur një hetim të plotë për të kuptuar shkakun e vdekjes”, ka thënë Ezike.
“Ne do të bëjnë gjithçka për të parandaluar përhapjen e këtij virusi vdekjeprurës. Nëse jo për të mbrojtur veten, atëherë për të mbrojtur ata që janë afër nesh”.
Vdekja e një fëmije pa mbushur 1 vjet ishte raportuar në Kinë, mirëpo foshnja është thënë të ketë pasur komplikime paraprake.